هغه ملا چې ' بلخ کې یې د روژه خورو' وېښتان پرې کول لېرې شوی

آخوند د انځور حقوق SOcialmedia

بلخ ولایت کې سیمه ییز چارواکي وايي د حج او اوقافو د ارشاد او جوماتونو ادارې مدیر مولوي محمد عارف وزین یې د سخت چلن له امله له دندې لېرې کړی دی.

تېرو ورځو کې د ښاغلي وزین ځینې عکسونو پر ټولنیزو شبکو خپاره شوي چې په کې یې د یوه ځوان وېښتان قیچي کول. ویل کېږي ښاغلي وزین د دغه کس وېښتان د دې لپاره پرې کول چې روژه یې نه وه.

ښاغلی وزین په دې هم تورن دی چې مزارشریف کې یې د یو شمېر پلورونکو خوراکي توکي اړولي دي.

د بلخ ولایت د حج او اوقافو مشر محمود دانشجو وايي ښاغلی وزین چې منکراتو سره د مبارزې د کمیسیون مشر هم و، د دې لپاره له دندې ګوښه شوی چې له خلکو سره یې زیږ چلن کاوه.

د ښاغلي دانشجو په وینا، د مزارشریف په ښار کې له پلورونکو سره چلن او د خلکو د وېښتانو پرې کول " زموږ له دینې روحیې سره اړخ نه لګوي."

د انځور حقوق Socialmedia
Image caption مولوي وزین د "روژه خواره ځوان" وېښتان قیچي کوي

دا په داسې حال کې ده چې مولوی عارف وزین رسنیو ته ویلي، ده داسې خلک نیولي چې په ښکاره یې روژه خوړله.

دی وايي: " ځوانان د چرګ د تاج په شان عجیب او غریب وېښتان پرېږدي. دا ټول زموږ له دیني ارزښتونو سره په ټکر کې دي. موږ له هغو کسانو سره مبارزه کوو چې زموږ د دیني ارزښتونو پر خلاف دي."

د حج او اوقافو وزارت مرستیال داعي الحق عابد بي بي سي ته وویل چې دوی به د رپوټو په اړه څېړنې کړي.

اړونده مطالب