افغان پوځ ته د مناسب لباس پېرلو کې ۲۸ میلیون ډالر ضایع شوي

Afghan National Army troops keep guard during a gunfight in Kunduz province د انځور حقوق Getty Images
Image caption جان ساپکو په یوه رپوټ کې وايي، د افغان پوځ لپاره دا درېشۍ د هغې جنګي سیمې لپاره مناسبې نه وې، چې دوی پکې جګړه کوي.

په افغانستان کې د امریکايي پروژو ځانګړی پلټونکی وايي، د ناسم غوراوي له امله د دفاع وزارت یا پنتاګون پر ۲۸ میلیون ډالرو افغان ځواکونو ته داسې لباس اخیستل شوي، چې کارول شوی نه دی.

جان ساپکو په یوه رپوټ کې وايي، د افغان پوځ لپاره دا درېشۍ د هغې جنګي سیمې لپاره مناسبې نه وې، چې دوی پکې جګړه کوي.

د نوموړي په خبره، دا یونیفورم د ځنګلي سیمو لپاره دی، خو د افغانستان یوازې ۲،۱ سلنه خاوره پر ځنګل پوښلې ده.

د ښاغلي ساپکو په خبره، پر ۲۰۰۷ کال امریکايي ځواکونو دا درېشۍ په خپل سر نه دي غوره کړې، بلکې د افغانستان دفاع وزیر عبدالرحیم وردګ هم له دوی سره افغان پوځ ته د لباس پېرل ارځول.

جان ساپکو د دې موندنو په خپل ۱۷ مخیز رپوټ کې وايي، عبدالرحیم وردګ د شخصي خوښې له مخې د امریکا دفاع وزارت په ګودامونو کې تر ټولو ګرانې درېشي وړاندیز کړې:

"کله چې عبدالرحیم وردګ پر انټرنېټ د درېشیو نمونې ولیدې، نو د غوراوي دلیل یې یواځې دا و چې دا نمونه یې خوښه ده".

له امریکايي ورځپاڼې یو اېس اې ټو ډې سره په خبرو کې جان ساپکو ویلي، که د عبدالرحیم وردګ ګلابي رنګ خوښ وی نو موږ به ګلابي درېشۍ ور کولې دا خو بلکل ساده توب دی، موږ به هیڅ پوښتنه نه کوله؟

" موږ د فېشن په نوم د مالیه ور کوونکو ۲۸ میلیون ډالر ضایع کړه، هغه هغه د یوه دفاع وزیر د خوښې له امله چې فکر یې کاوه، درېشۍ ښایسته دي".

د امریکا د مشرانو جرګې جمهوریپال سناتور چاک ګرسلي ایټ دا رپوټ شرموونکی او امریکايي مالیه ور کوونکو ته سپکاوی بللی دی.

" هغوی چې په ناسمو درېشیو یې پیسې ضایع کړې دي، داسې اېسي لکه سلیم عقل چې نه لري".

په افغانستان کې د امریکايي پوځ سرپلټونکي د مالي سرچینو د ضایع کېدو له امله په ځلونو پر پنټاګون نیوکه کړې ده.

تېره جنوري نوموړي واشنګټن کې اندیځ (فکري مرکز) ته په وینا کې وویل، د اسنادو له مخې د طالبانو مشرانو له قومندانانو غوښتي و، چې امریکایي سونتوکي، مهمات او وسلې له افغان ځواکونو وپېري، ځکه چې ارځان دي.

افغان جګړه د امریکا په تاریخ کې تر ټولو اوږده بلل کېږي.

وروستۍ موندنې په داسې مهال دي چې واشنګټن غواړي افغانستان ته نور ځواکونه واستوي.

ولسمشر ټرمپ د نور پوځ د لېږلو پرېکړه پنتاګون یا دفاع وزارت ته سپارلې ده.

امریکايي رسنۍ وايي، ښايي پنتاګون څو زره امریکايي سرتېري افغانستان ته ولېږي.

ورته مطالب