امریکا او هند د " ترهګریزو بریدونو" له امله پاکستان ته خبرداری ور کړ

د هند لومړی وزیر له ولسمشر ټرمپ سره خبرې غونډې ته وویل په افغانستان کې د ترهګرۍ له امله د بې ثباتۍ پراخیدل د نوي ډېلي او واشنګټن ګډه اندیښنه ده. د انځور حقوق Getty Images
Image caption د هند لومړی وزیر له ولسمشر ټرمپ سره خبرې غونډې ته وویل په افغانستان کې د ترهګرۍ له امله د بې ثباتۍ پراخیدل د نوي ډېلي او واشنګټن ګډه اندیښنه ده.

د امریکا ولسمشر او د هند لوړي وزیر پر پاکستان غږ وکړ چې د ترهګریزو بریدونو لپاره دې د خپلې خاورې نه کارېدل باوري کړي.

دا خبرې د دواړو مشرانو له لیدنې وروسته د سپینې ماڼۍ په یوه اعلامیه کې خپرې شوي.

"دواړو مشرانو پر پاکستان غږ وکړ چې باوري کړي، خاوره به یې د دوی پر هېوادونو د ترهګریزو بریدونو لپاره نه کارېږي".

امریکا ته د نرېندر مودي د تللو بهیر کې واشنګټن د کشمیر یو وسله وال مشر د ترهګرو نومړل ته ور زیات کړی دی.

د سپینې ماڼۍ له بیان له مخې " نوي ډېلي د واشنګټن د دې ګام هرکلی وکړ چې د کشمیر وسله وال سید صلاح الدین يې د نړیوال ترهګر نوملړ ته ور زیات کړ".

دواړو لورو د پاکستان مېشتو جیش محمد او لښکر طیبه په ګډون د ګواښ پر ضد د خپلمنځي همکارۍ زیاتولو ژمنه هم کړې ده.

" له ترهګرۍ زیانمن واشنګټن او نوی ډېلی"

په ورته مهال د امریکا ولسمشر ډونلډ ټرمپ له نرېندر مودي سره خبرغونډې ته وویل، چې له هند سره د متحده ایالتونو اړیکي له دې مخکې "هیڅ کله هم دومره پیاوړې نه وې".

د انځور حقوق Getty Images
Image caption تېره ورځ مودي وویل: هند هغه مهال نړۍ ته " خپل ځواک ثابت کړ" چې په پاکستان کې یې " هدفي بریدونه"وکړل.

د ولسمشر ټرمپ په خبره، د امنیت په برخه کې د دواړو هېوادونو ترمنځ همکارۍ ډیره مهمه ده.

" دواړه ملتونه د ترهګرۍ له شره زیانمن شوي، موږ دواړو پتیلې چې ترهګرۍ ډلې او هغه سخت دریځه فکر چې دوی یې هڅوي له منځه یوسو".

ډونلډ ټرمپ د خپلمنځي سوداګرۍ د پراخولو هڅو یادونه هم وکړه.

د نوموړي په خبره، په دې برخه کې دا مهمه ده چې پر امریکايي صادراتو محدودیتونه لرې شي او د دواړو هېوادونو ترمنځ د سوداګرۍ کسر له منځه ولاړه شي.

افغانستان، د هند او امریکا ګډه اندېښنه

د هند لومړی وزیر وايي په افغانستان کې د ترهګرۍ له امله د بې ثباتۍ پراخیدل د نوي ډېلي او واشنګټن ګډه اندیښنه ده.

نرېندر مودي له ولسمشر ټرمپ سره ګډې غونډې ته دا هم وویل، چې هند او امریکا د افغانستان په بیارغونه او امنیت کې مهم رول لوبولی او دوام به ور کړي:

"په افغانستان کې د سولې او امنیت لپاره به موږ له نږدې سلا مشورو او اړیکو ته دوام ورکړو. د هند سمندر په سیمه کې ټیکاو، امنیت او روڼتیا راوستل زموږ د ستراتیژیکو همکاریو بله موخه ده".

د امریکا او هند د مشرانو دا څرګندونې په داسې مهال دي، چې د متحده ایالتونو لوی درستیز کابل ته رسېدلی دی.

نوموړی له افغان لوړپوړو چارواکو سره د افغانستان لپاره د امریکا پر نوې ستراتیژۍ خبرې کوي.

ورته مطالب