د فراه د شیب کوه ولسوال له پنځو ساتونکو سره ووژل شو

د انځور حقوق FB
Image caption وسلوالو طالبانو په ټویټ کې د عبدالرحیم حیدري د وژلو خبر خپور کړی دی.

د فراه د شیب کوه ولسوال عبدالرحیم حیدري په سړک غاړې بم چاودنه کې وژل شوی دی.

د فراه د والي ویاند ناصر مهري رسنیو ته په استولې اعلامیه کې ویلي، د نوموړي او د هغه د پنځو ساتونکو وژل تایید کړي دي.

د نوموړي په خبره، عبدالرحیم حیدري د شیب کوه په دور جو سیمه کې تېر مازیګر وژل شوی دی.

د عبدالرحیم حیدري د وژنې په هکله دا هم ویل کېږي، چې موټر پسې نښلېدلي بم وژلی دی.

ځینې رپوټونه دا هم وايي، چې له نوموړي سره په پڼځو وژل شویو کسانو کې یې یو زوی هم دی.

د وسلوالو طالبانو ویاند ذبیح الله مجاهد په یوه ټوېټ کې ویلي، چې عبدالرحیم حیدري یې له پنځو ساتونکو سره وژلی دی.

عبدالرحیم حیدري په خواله رسنیو کې د فراه ولایت یو مخور شخص بلل شوی.

فراه له هلمند وروسته د افغانستان تر ټولو لوی ولایت بلل کېږي.

د دغه ولایت د ډېری ولسوالیو خلک له ناامني شکایت کوي.