''وسله والو طالبانو سرپل کې ۲۳۵ ملکي کسان خوشي کړي''

سرپل د انځور حقوق Alamy
Image caption سرپل ولایت رسنیو دفتر د خوشي شویو کسانو تصویرونه خپاره کړي دي

د افغانستان سرپل ولایت کې ځايي چارواکو ویلي ، د والي په هڅه او د سیمه ییزو مخورو په منځګړتوب هغه ۲۳۵ ملکي کسان خوشي شوي چې وسله والو طالبانو یرغمل کړي وو.

د سرپل د والي ویاند ذبیح الله اماني بي بي سي ته ویلي په مرزااولنګ سیمه کې، چې اوس هم د طالبانو کنترول کې ده ډېر کسان ایسار دي.

د سرپل ولایت د رسنیو دفتر د خوشي شویو کسانو انځورونه خپاره کړي او دغه ولایت ته یې د ځمکنيو او هوايي ځواکونو د رسیدلو خبر هم ورکړی.

اوس د سرپل والي ویاند ذبیح الله اماني بي بي سي ته وویل د سیمې د مشرانو په مرسته یې ۲۳۵ بند پاته شوي کسان را خوشي کړي دي.

ښاغلی اماني وايي چې د خوشي شوو کسانو رواني حالت ښه نه دی.

''له نیکه مرغه د ولایت مقام په هڅه او د سیمې د مشرانو په منځګړتوب ۲۳۵ کسان، چې له څو ورځو راهیسې په میرزاولنګ کلي کې د طالبانو ولکه کې وو راخوشي شوي دي ''

سیمه ییز چارواکي: طالبانو سرپل ولایت کې لسګونه ولسي وګړي وژلي

امنیتي چارواکي: سرپل کې لسګونه مخالف وسله وال وژل شوي

سرپل کې د طالبانو ضد چاڼیز عملیات کېږي

له دې مخکې ځايي چارواکو له وسله والو سره د جګړې لپاره د ځواک د کمښت شکایت کړی و.

وسله والو طالبانو د صیاد ولسوالۍ اړوند دغه سیمه د تېرې شنبې پر ورځ نیولې وه او د ځايي چارواکو په خبره ۵۲ ملکي کسان یې په ډېره (بې رحمۍ) وژلي وو.

افغان ولسمشر محمد اشرف غني نن (سې شنبه) یوې غونډې ته وینا کې وویل، چې د (دین او هېواد) دښمنانو ثابته کړه، چې هېڅ پوله او حد نه پېژني.

د نوموړي په خبره د (مرزااولنګ ټولوژنې) غچ به اخلي.

طالبانو ویلي وو چې په میرزاولنګ کې خلک د جګړې له امله ایسار پاتې وو او دوی یې د وتلو هڅه کړې وه.

طالبانو د ولسي وژنو په اړه ادعاوې هم دروغ بللې او ویلي یې دي چې د میرزااولنګ د نیولو په جګړه کې یې یوازې وسله وال کسان چې دوی یې سیمه ییزې ملیشې بولي او شمېر یې ۲۸ ښيي وژل شوي دي.

ناټو چارواکو هم د مرزااولنګ سیمې د حالت په اړه خواشیني څرګنده کړې ده.

د انځور حقوق SARIPUL MEDIA/FB

په افغانستان کې د ناټو ملکي استازي کورنلیوس زیمرمن ویلي:

"موږ په سرپل کې د لسګونو ملکي کسانو، ښځو، نارینه وو او ماشومانو د وژل کېدو او د کورنیو د یرغمل کېدو له کبله ډېر اندېښمن یو".

په افغانستان کې هم د امریکا سفارت هم په مرزااولنګ سیمه کې پرملکي وګړو برید (( وحشیانه)) بللی و.

اړونده مطالب