هرات کې د احمدشاه بابا د تاج په سرونې ۲۷۰ کلیزه

ارشیف د انځور حقوق Wolasi tahrek

د معاصر افغانستان د بنسټګر احمدشاه بابا د تاج په سر کولو ۲۷۰مه کلیزه په هرات کې ولمانځل شوه.

دغه غونډه د افغانستان د ولسي تحریک ګوند له خوا جوړه شوې وه چې سلګونو هراتیانو پکې ګډون کړی و.

د غونډې برخه والو له افغان حکومته ځانګړې غوښتنې لرلې.

د افغانستان د ولسی تحریک ګوند غړی نثار احمد نوري بي بي سي ته وویل، د احمدشاه بابا عکس دې د ملي زغیم په توګه د ولسمشر د عکس تر څنګ په دولتي ادارو کې وځړول شي:

"په هند کې د نهرو او په پاکستان کې د جناج عکسونه همداسې اېښودل کیږي. بله دا چی د شیر سرخ جرګې ورځ دې د عمومي رخصتۍ په توګه اعلان شی.))

Image caption موټریز کاروان د هرات ښار په کوڅو کې وګرځېد

غونډه د هرات سټوډیم ته څېرمه جوړه شوې وه چې تر پای وروسته یې د ګډونوالو خورا اوږد موټریز کاروان د ښار په لارو او کوڅو کې وګرځېد.

د موټریز کاروان برخه والو د افغانستان ملي بیرغونه له ځان سره لېږدول.

د غونډې برخه والو ویل، په افغانستان کې اوس تر بل هر وخت د خلکو تر منځ د یووالي ټینګښت لپاره هلو ځلو اړتیا ده.

د دوی په خبره، د معاصر افغانستان د بنسټ ایښودونکی احمد شاه بابا د تاج په سرونې د ورځې لمانځنه یووالي ته د رسېدو لپاره غوره مناسبت دی.

ورته مطالب