د بامیان دوه امنیتي افسران پر نجلۍ د جنسي تېري په تور نیول شوي

بامیان د انځور حقوق Getty Images
Image caption بامیان د هېواد له امنو ولایاتو دی چې د تاوتریخوالي پېښې په کې کمې دي

د افغانستان د مرکزي ولایت بامیانو چارواکي وایي، دوه امنیتي منسوبین پر یوې نجلۍ د جنسي تېري په تور نیول شوي دي. د چارواکو په خبره، د نیول شویو کسانو یو د امنیه قومندانۍ او بل د ملي امنیت ادارې اړوند دي.

په بامیانو کې دوه امنیتي افسران داسې مهال نیول شوي چې د سیمه ییزو چارواکو په وینا، دوی د بامیانو د پولیسو په رنجر موټر کې پر یوې نجلۍ جنسي تېری کړی.

د بامیانو د والي ویاند عبدالرحمن احمدي وایي، دا افسران بالفعل د تېري پرمهال نیول شوي او څارنوالۍ ته ورپېژندل شوي دي:

"د امنیتي ارګانونو دوه منسوبین، یو یې د بامیانو د امنیه قومندانۍ د امنیت آمر مرستیال او بل یې د همغږۍ اداره کې د ملي امنیت ادارې استازی دی. دواړه په بامیانو کې لوړپوړي امنیتي چارواکي ګڼل کېږي. دواړه زموږ د امنیتي او کشفي ادارو د کارکوونکو لخوا د جنسي تېري پرمهال بالفعل نیول شوي دي."

د بامیان معترض پښتانه او تاجک: له هزاروو سره برابر حقونه غواړو

بامیان کې یوه مین هلک نجلۍ وژلې او ځان یې پولیسو ته سپارلی

د بامیانو د یوې میاشتې اته مرموزو وژنو تر شا څوک دي؟

د جنسي تېري د قرباني د عمر او هویت په تړاو څه نه دي ویل شوي.

دا خبر داسې مهال خپرېږي چې په دې وروستیو کې د افغانستان د بشري حقونو خپلواک کمیسیون اعلان وکړ چې د روان میلادي کال په لومړیو لسو میاشتو کې یې د ښځو پروړاندې د تاوتریخوالي ۳۸۰۰ پېښې ثبت کړي دي.

د کمیسیون د معلوماتو له مخې، په دې کې ۱۸۶ مورده جنسي تاوتریخوالی او له دې ډلې ۳۸ د جنسي تېري پېښې دي.

ورته مطالب