جمعيت اسلامي: بلخ ولايت لپاره فرهاد عظیمي زموږ کاندید دی

د انځور حقوق FARHAD AZIMI FACEBOOK
Image caption فرهاد عظیمي ولسي جرګه کې د بلخ استازی دی

د افغانستان ولسمشرۍ ماڼۍ سرچینې وایي، اسلامي جمعیت ګوند ورته وړاندیز کړی چې د ولسي جرګې غړی او عطامحمد نور ته نژدې کس فرهاد عظیمي باید د بلخ د والي په توګه وټاکل شي.

خپله فرهاد عظیمي هم له بي بي سي سره خبرو کې ومنله چې دی د بلخ ولایت لپاره د جمعیت ګوند او په ځانګړې توګه د ښاغلي نور نوماند دی.

جمعیت ګوند وایي، ټوله هڅه یې داده چې د دوئ او ارګ ترمنځ راولاړه شوې سیاسي لانجه په سوله ییز ډول هواره شي.

د دغه ګوند ویاند واقف حکیمي بي بي سي ته ویلي د ولسمشرۍ ماڼۍ او دوی تر منځ خبرو کې ښاغلي نور تر ګوښه کېدو وروسته د ښاغلي عظیمي ټاکنه یو شرط و.

ولسمشرۍ ماڼۍ وایي، عطا محمد نور منلې چې دنده پرېږدي، خو په دې شرط چې د ده د خوښې کس فرهاد عظیمي یې ځای ناستی شي.

په دغې ماڼۍ کې باوري سرچینو د نوم نه ښودلو په شرط بي بي سي ته وویل، د جمعیت ګوند له خوا یې دغه وړاندیز ترلاسه کړی، خو تراوسه یې د هو یا نه ځواب نه دی ورکړی.

سرچینې زیاته کړې، اوس دوئ په داسې یوه حالت کې نه دي چې په دې اړه ډیر جزیات ورکړي.

خپله د جمعیت ګوند غړی او په ولسي جرګه کې د بلخ استازی فرهاد عظیمي هم مني چې دی د خپل ګوند او په ځانګړې توګه عطا محمد نور له خوا د بلخ ولایت نوماند دی.

ښاغلی عظیمي وایي، که دی د بلخ والي په توګه وټاکل شي د جمعیت ګوند او ارګ ترمنځ راپورته شوې لانجه به هواره شي.

د جمعیت اسلامي ګوند ویاند واقف حکیمي وايي:

''که د استاد عطا محمد نور پر ځای ښاغلی فرهاد عظیمي د بلخ والي په توګه وټاکل شي، له سوله ییزې لارې به د دغې موضوع د حل لپاره یو رغنده ګام اخیستل شوي وي. ''

جمعيت: د عطا نور په تړاو د حکومت د پرېکړې اعلان نامسوولانه گام دى

عطا محمد نور: زما د استعفا په تړاو د ارگ پرېکړه را ته د منلو نه ده

بل لور ته په ولسمشرۍ ماڼۍ کې یوې سرچینې بي بي سي ته ویلي، اوس ښاغلي نور (خپله استعفا منلې) خو غواړي په ولسي جرګه کې د بلخ استازی فرهاد عظیمي د بلخ والي په توګه وټاکل شي.

ارګ درې ورځې مخکې اعلان وکړ، چې ولسمشر محمد اشرف غني 'د بلخ والي عطا محمد نور ' استعفا تایید کړې ده. په هغه خبر پاڼه کې چې رسنیو ته استول شوې وه، ویل شوي وو، چې د ښاغلي استعفا څه موده مخکې سپارلې وه.

ښاغلي نور د ارګ له لوري د خپلې استعفا تایید (ناسم) بللی و او له منلو یې انکار کړی و.

عطا محمد نور ویلي و، څو میاشتې مخکې یې د خپل ګوند په استازیتوب له ارګ سره خبرې پیل کړې ولسمشر ته یې د دې لپاره استعفا وړاندې کړې وه، چې د غوښتنو له منل کېدو وروسته یې تایید کړي.

د ښاغلي نور په وینا یوازې ځینې غوښتنې یې منل شوې دي او له همدې کبله یې استعفا د منلو نه ده او ردوي یې. جمعیت ګوند دغه راز تور پورې کړ، چې د عطا محمد نور په تړاو د ولسمشرۍ پرېکړه (انحصار غوښتونکی عمل) دی. اوس د دغه ګوند ویاند وايي:

''جمعیت اسلامي غواړي موضوع له سوله ییزې لارې حل شي. ښاغلی نور د ولایت مقام کې پر پاتې کېدو ټینګار نه کوي، شرطونه یې درلودل او یو شرط یې د بلخ والي په توګه د ښاغلي عظیمي ټاکنه ده، اوس ارګ اختیار لري چې څنګه پرېکړه کوي. ''

د انځور حقوق FB/ATTA MOHAMMAD NOOR
Image caption ښاغلي نور نژدې ۱۵ کاله د بلخ والي په توګه دنده لرله

بل لور ته ښاغلي عظیمي ویلي، چې له یوه کال راهیسې د ښاغلي نور له لوري د بلخ ولایت ته کاندید دی.

نوموړي دغه راز ادعا کړې، چې ولسمشر غني ورسره څو ځلې مخکې لیدلي او د هغه له ټاکل کېدو سره موافق دی. فرهاد عظیمي له دې مخکې د بلخ ولایتي شورا مشر و او د ولسي جرګې شپاړلسمه دوره کې د بلخ استازی دی.