خوست والي: ځاځي میدان کې جګړه درېدلې

په دې وسیله کې د غږ اوريدل او ویډیو لیدنه شونې نه ده.
خوست کې د افغان او پاکستاني ځواکونو جګړه

د خوست والي حکم خان حبیبي بي بي سي ته ویلي، د دې ولایت په ځاځي میدان ولسوالۍ کې هغه نښته چې نن سهار پيل شوې وه، اوس درېدلې.

ښاغلی حبیبي وایي، جګړه د پاکستاني لوري په غوښتنه درول شوې او وضعیت اوس د افغان سرحدي ځواکونو تر کنترول لاندې دی.

نوموړي زیاته کړه، هغه سیمې یا پوستې چې پاکستاني ځواکونو یې د نیولو هڅه کوله، اوس د افغان ځواکونو په ولکه کې دي او دواړه خواو اوربند کړی.

و والي په وینا، د سیمې اوسېدونکو او افغان ځواکونو د پاکستاني ملیشو د دې کار مخنیوی وکړ او تر درنې جګړې وروسته یې پاکستاني لوري ته درنه مرګ ژوبله ور اړولې.

نوموړی ادعا کوي چې د پاکستاني ملیشو یو شمېر جسدونه په سیمه کې پاتې دي او د درییو هغو مړي یې افغان ځواکونو له ځان سره راوړي دي.

د خوست والي په دې جګړه کې د دوه تنو افغان ولسي وګړو د وژل کېدو خبره هم تائید کړه.

ښاغلي حبیبي له بي بي سي سره په یوه ځانګړې مرکه کې وویل، پاکستاني پوځیانو تېره شپه دوه بجې هڅه وکړه چې د جنډو سر سیمه کلابنده کړي او د اکمالاتو لاره یې هم بنده کړي، خو ولسي وګړو او افغان سرحدي ځواکونو یې مخه ونیوله.

Image caption ځایي خلکو هم د افغان ځواکونو په ملاتړ جګړې ته ور دانګلي

پاکستاني حکومتي سرچینو ویلي چې په جکړه کې یې دوه پوځیان وژل شوي او ۵ نورټپیان دي.

ځاځي میدان ولسوالۍ بازار ته په رسیدو د ښار ګوټي زیاتره دوکانونه تړلي و او د سیمې خلک د پولې ساتنې په موخه جګړې ته تللي وو.

د سیمې اوسیدونکو له جګړې د راستنیدو په حال کې د بي بي سي سیمه ییز خبریال ته وویل، دوی د پاکستان د امنیتي ځواکونو ځیني وسایل، لکه وسلې، پوځي خولۍ او د نویو پوستو د جوړولو وسایل هم راوړي و.

دوی د یوه وژل شوي پاکستاني سرتیري مړی افغان امنیتي ځواکونو ته وسپاره. ځایي اوسیدونکو چې د پولې ساتنه کوي ادعا کوله چې یو پاکستانی سرتیری یې ژوندی نیولی او افغان ځواکونو ته یې سپارلی دی.

د بي بي سي خبریال احمد شاه متونوال د جګړې کرښې ته نږدې ورغلی و او وایي چې په جندو، ګورګورۍ او لندغرو پوستو باندې تر غرمې مهال د پاکستان ځواکونو د توپونو ډزې روانې وې.

پاکستاني چورلکو او جیټ الوتکو هم سیمه کې الوتنې کولې خو بمبارد یې ونکړ.

د ځاځي میدان ولسوالۍ دوه اوسیدونکي له پاکستاني ځواکونو سره جکړه کې وژل شوي و او درې نور ټپیان و.

خوست کې د ملي اردو یو چارواکي محمود ځاځي بي بي سي ته وویل، افغان ځواکونو هم سیمه کې توپچي ځواکونه ځای پرځای کړي و او د ډیورنډ کرښې پر بل غاړه ډزو کولو امر منتظر دي.

Image caption افغان توپچي ځواکونه په سیمه کې ځای پر ځای شوي دي

پاکستان منلي چې په جکړه کې یې دوه پوځیان وژل شوي او ۵ نورټپیان دي.

ځاځي میدان د خوست ښار شمال ختیځ ته په پنځوس کیلومتري واټن کې پرته ارامه ولسوالۍ ده.

دغه ولسوالي د ډیورنډ کرښې هغه غاړه له کورمې ایجنسۍ او پاړه چینار سره ګډه پوله لري.

Image caption افغان ځواکونه وایي، د ځوابي برید امر ته منتظر دي

په ځاځي میدان کې دغه جګړه په داسې حال کي کیږي چې نژدې دوه اونۍ وړاندې کابل ته د پاکستان د صدر اعظم د سفر پر مهال دواړو هیوادونو هوکړه وکړه چې د یوه بل په فضایي او ځمکني حریم به تیری نه کوي.

د افغانستان او پاکستان ترمنځ غځیدلې ډیورند کرښه ډېر ځله د دا ډول نښتو شاهده پاتې شوې. کال وړاندې د کندهار په سپین بولدک کې هم ورته نښته شوې او له هغه وړاندې د ننګرهار په ګوشتې او د کونړ په سرحدي سیمو کې همداسې شخړې شوې دي.

ورته مطالب