پخوانی قاضي القضات فضل هادي شينواری په هند کې ومړ

فضل هادي شينواری
Image caption نوموړب د طالبانو له ماتې وروسته د افغانستان د سترې محکمې مشر شو او ولسمشر حامد کرزي ته نژدې کس بلل کيده .

مولوي فضل هادي شينوارى د افغانستان له پيژندل شويو مذهبي مشرانو شميرل کيده او له څو کلونو راپديخوا دافغانستان د عالمانو د شورا مشر وو .

د طالبانو له ماتې وروسته د افغانستان د سترې محکمې مشر شو او ولسمشر حامد کرزي ته نژدې کس بلل کيده .

د عالمانو په شورا کې په وار وار نوموړي د حکومت پر وسله والو مخالفينو غږ وکړ چې وسله پر ځمکه کيږدي او د روغې او پخلاينې لاره خپله کړي .

فضل هادي شينواری شاوخوا ۸۵ کاله وړاندي د ننگرهار د هسکې مېنې د شينوارو په ولسوالۍ کې زيږيدلی وو.

لومړنۍ زده کړې يې په خپل کلي کې پيل ، سملاسي وروسته د کابل په دارالعلوم کې شامل او په لمريز کال ١٣٣٣ کې ترې فارغ شو چې په خپل وخت کې د ديني او مروجو زده کړو معتبره مدرسه وه .

فضل هادي شينواري شيخ الحديت او د قران کريم حافظ وو .

د کابل له دارالعلومه تر فارغيدو سملاسي وروسته نوموړي په پلازمينه کابل کې د ابن سينا په ښونځي کې د ښونکي په توگه دنده تر پيل کړه .

د ده نژدې ملگري وايي چې د کار په دغه څلور کلنه موده کې يې د وخت د واکمنو له ډلې له سردار محمد داود خان سره يو څه زړه بدوالی رامنځ ته شو او په ننگرهار کې د نجم المدارس مدرسې ته د مدرس په توگه تبديل کړى شو.

په نجم المدارس کې تر ١٥ کلن تدريس وروسته چې کله په کال ١٣٥٢ کې سردار داود خان ولسمشر شو فضل هادي شينوارى پا کستان ته مهاجر شو .

لومړى پيښور ته نژدې په باړه کې استوگن شو ، دوه کاله وروسته يې د افغانستان پولو ته نژدې په دره ادم خيلو کې د يوې مدرسې بنسټ کيښود چې تر ٢٠٠٢ کاله پورې د همدې مدرسې مشر وو ، دغه مدرسه اوس هم فعاله ده .

مولوي فضل هادي شينواری په ١٣٥٧ کال کې د جهاد له پيلېدو د ډاکټر نجيب تر واکمنۍ پورې د صبغت الله مجددي په مشرى په ملي نجات گوند کې وو ، خو په خپله قومندان نه وو بلکې د خپلو شاگردانو او پلوېانو سره به له مدرسې د جگړې ډگر ته راته .

له هغه وروسته د عبدالرب رسول سياف سره ملگرى شو او د طالبانو پر مهال د ډيورنډ له پولې پورې غاړه په خپله مدرسه کې وو .

سره له دې چې د ده ډير شاگردان د طالبانو د غورځنگ په ليکو کې وو ، خو له هغوى سره يې ښکاره مخالفت درلود او د يوه شاګرد وينا يې ده چې نوموړي ته د طالبانو کړنې د منلو نه وې .

سره له دې چې په دغه موده کې فضل هادي شنيواري له جهادي مشر استاد سياف او د طالبانو له نورو مخالفينو سره ملگرى وو ، خو په دغه موده کې د شمالي ټلوالې تر واک لاندې سېمو ته ولاړ نه.

مولوي فضل هادي شينواری د افغانستان په تير شاوخوا نهه کلن سياسي بهيرکې فعاله ونډه لرله او د دوو زرو عالمانو په گډون د افغانستان د عالمانو د شورا مشر وو.

او ترې وړاندې د دغه هيوا د تاريخ په حساسو شېبو کې قاضي القضات هم پاتې شوى چې ډير شمير ملگري يې په دواړو دندو کې بريالى بولي .

له ښاغلي شينواري ١٤ اولادونه پاتې دي چې اته يې زامن دي.