کرزی: طالبان د بهرنیانو پاتې کېدو ته زمینه برابروي

ښاغلی کرزی

ښاغلي کرزي جوته کړه چې د حکومت ټول وسله وال مخالفين ترهګر نه دي، بلکې په کور دننه د بې عدالتۍ په ګډون يې د ځينو لاملونو له کبله وسله پورته کړې ده.

افغان ولسمشر حامد کرزي پر وسله والو طالبانو غږ وکړ چې په افغانستان کې د بهرنيانو دايمي حضور ته فرصت برابر نه کړي .

ولسمشر کرزي دغه څرګندونې په افغانستان کې سوله ييز ژوند ته د طالبانو د بېرته ورستنېدو د غوښتنې پر مهال وکړې.

افغان ولسمشر حامد کرزي پر داسې مهال پر وسله والو طالبانو له تاوتريخوالي د لاس اخيستو غږ کړی چې د افغانستان او لوېدیځ ترمنځ په افغانستان کې د دايمي پوځي اډو پر سر خبرې روانې دي.

حامد کرزي وويل د وسله والو طالبانو په بريدونو ، ماينونو او ځانمرګو بريدونو کې د ملکي خلکو وژل بهرنيانو ته په افغانستان کې د اوږد مهال پاتې کېدو ته فرصت برابروي.

ولسمشر وويل پر ملکيانو د طالبانو بريدونه به په افغانستان کې جګړه او د اوسني کړکېچ لمن لا پسې پراخه کړي:

''دلته زه يو ځلې بيا له وسله والو مخالفينو غواړم چې د ولسي وګړو وژنو ، چاودنو او ځانمرګو بريدونو ته پای ورکړي ، پرته له دې، دا پخپله په افغانستان کې د بهرنيو پوځيانو د حضور او د جګړې او شخړو د دوام لامل ګرځي.''

''بهرنیان ځکه افغانستان ته راغلي...''

ښاغلي کرزي زياته کړه بهرنيان ځکه افغانستان ته راغلل چې ، نورو بهرنيانو له افغانستان نه پر دوی بريد وکړ.

ښاغلي کرزي جوته کړه چې د حکومت ټول وسله وال مخالفين ترهګر نه دي ، بلکې په کور دننه د بې عدالتۍ په ګډون يې د ځينو لاملونو له کبله وسله پورته کړې ده.

ده له دا ډول کسانو يو ځلې بيا وغوښتل چې وسله پر ځمکه کيږي او د افغانستان د پرمختګ او هوساينې لپاره را مخکې شي.

دا څويم ځل دی چې افغان چارواکي په افغانستان کې د بهرنيو پوځي اډو په باب خبرې کوي ، او ولسمشر کرزي خو يو ځل وويل چې لويديځ ورسره په افغانستان کې د پوځي اډو په اړه خبرې هم کړي دي.

که څه هم پخپله امريکايي چارواکي په افغانستان کې د دايمي پوځي اډو په اړه ظاهرآ دومره لېوالتيا نه ښيي ، خو دغې موضوع په سيمه ييزه کچه بېلا بېل غبرګونونه له ځانه سره لرل.

د افغان حکومت دننه او له حکومت نه بهر افغان سياستوال هم په دې برخه کې يوه خوله نه دي، ځينې په افغانستان کې د امريکا پوځي اډې د افغانستان په خېر بولي ، خو ځينې نور ورسره مخالف دي.

له موږ سره اړيکه ټينگه کړئ

* اړينې برخې په نخښه کوي

(تيلې فون شميره)

ستاسو شخصي معلومات به يوازې د دې غوښتنې د پوره کولو لپاره کاريږي

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .