"باور کوي د معاملې له مخې خوشې شوي"

فرانسوي خبریالان د انځور حقوق AFP
Image caption دغه دوه فرانسوي خبريالان او افغان ژباړن يې يو نيم کال د طالبانو په يرغمل کې وو.

د طالبانو له لوري د هغو دوو خوشې شويو فرانسوي خبريالانو ، يوه يې بي بي سي ته ويلي باور کوي چې دوی د يوې معاملې په پاېله کې خوشي شوي دي.

د تلويزيون خبريال هروي گې گيغ ويلي گمان کوي چې طالبانو ته به پيسې ورکړل شوي وي او لږ تر لږه دوه افغان طالبان هم د دوي په بدل کې خوشې شوي دي.

ښاغلی گې گيغ، ملگری يې او ورسره افغان ژباړن د چهارشنبې په ورځ له ١٨ مياشتو بند وروسته خوشې شوي دي.

کابل او پاريس طالبانو ته د پيسو له ورکولو انکار کوي، خو طالبان وايي چې د دغو دوو فرانسويانو په بدل کې يې څو تنه ملگرې ازاد شوي دي.

د طالبانو له لوري په خپره شوې اعلاميه کې نه دي ويل شوي چې کوم کوم طالب مشران د دوی په بدل کې خوشي شوي، خو ويلي يې دي چې دغه کسان د طالبانو د غورځنګ د لوړې کچې مشران دي.

دغه دوه فرانسوي خبريال د ميلادي ۲۰۰۹ کال په ډسمبر مياشت کې له افغان ژباړن رضاالدين سره يو ځای د افغانستان په شمال ختيځ کاپيسا ولايت کې وتښتول شول.

فرانسوي چارواکو تر اوسه د دغو دوو خبريالانو د ازادېدو د لاملونو په اړه څه نه دي ويلي، خو يو تن ازاد شوی خبريال وايي چې طالبانو ته " د پيسو او لږ تر لږه د دوو بنديانو د خلاصېدو" ژمنه ورکړل شوې وه.

ده بي بي سي ته وويل چې " د خپلې دغې خبرې د ثبوت لپاره هېڅ بېلګه نه لرم". هغه وويل چې تښتونکو ورته هېڅ وخت ونه ويل چې ولې يې تښتولي دي، خو له هماغه اوله سره روښانه وه چې طالبان د تبادلې په لټه کې دي.

دغه خبريالان وايي چې تر ډېره وخته د دوی ژوندي پاتې کېدل د دې نښه ده چې د فرانسې څارګره اداره له طالبانو سره په اوږدو او برياليو خبرو بوخته وه.

هغه مهال چې د دغو دوو فرانسوي خبريالانو د سپرلۍ الوتکه د پاريس په هوايي ډګر ښکته کېده، د دوی هرکلی د فرانسې ولسمشر نېکولای ساغکوزي وکړ.

تېره ورځ بې پولې خبريالانو د يوې وينا پاڼې په خپرولو سره د طالبانو له منګولو د دغو دوو فرانسوي خبريالانو او د هغوی د افغان ژباړن د خوشې کېدو هر کلی وکړ.

ورته مطالب