افغانستان ته د قرآن کریم لرغونې نسخه ستنه کړی شوه

قرآن کریم د انځور حقوق AP
Image caption که څه هم ددغې نسخې لرغونتوب پنځه پېړۍ ښودل شوی، خو افغان کلتوري چارواکي وايي چې ډېر ژر به په دقیقه توګه افغان کارپوهان ددې نسخې قدامت په ډاګه کړي.

یوې سویسي سیلانۍ د قرآن کریم یوه لرغونې نسخه د هرات ملي موزیم ته د ډالۍ په توګه وسپارله.

دغه سیلانۍ د قرآن کریم دا نسخه ۴۰ کاله وړاندی په کابل کې د ۲۰۰۰ ډالرو په بدل کې ترلاسه کړې وه.

که څه هم د قرآن کریم دغه نسخې قدامت ۵۰۰ کاله بلل شوی، خو افغان چارواکي وایي یوه ځانګړې ډله به په دقیقه توګه د دې نسخې لرغونتوب معلوم کړي.

د قرآن کریم دغه نسخه چې په نسخ خط لیکل شوې، یوازې ۱۵ سپارې لري او د ځینو مخونو شاوخوا یې په مذهب ډول تزیین شوي.

دغه نسخه د الیزابت روبي په لاس افغانستان ته ستنه کړی شوې ده.

مېرمن روبي چې د اسلامي کلتور او علومو په برخه کې یې لوړې زده کړې کړې، وايي چې ښايي دا نسخه په کشمیر او د تیموریانو د واکمنۍ په پېر کې لیکل شوې وي.

نوموړې وايي، دې پرېکړه کړې چې تیموریانو د هغه مهال پلازمېنې هرات ته راوړي:

ګوهر شاد

''ددې نسخې مینیاتور به ښايي د تیموریانو له دورې څخه وي د بایسنقر او بهزاد د زمانې، نه پوهېږم چې څنګه له کشمیره افغانستان ته راوړل شوې، زما د تیموریانو عصر ډېر خوښېږي ځکه نو ما وغوښتل چې دا هرات ته راوړم.''

که څه هم ددغې نسخې لرغونتوب پنځه پېړۍ ښودل شوی، خو افغان کلتوري چارواکي وايي چې ډېر ژر به په دقیقه توګه افغان کارپوهان ددې نسخې قدامت په ډاګه کړي.

د هرات د اطلاعاتو او کلتور مرستیال محمد رفیق ګیلاني وايي:

''دا نسخه به په رسمي توګه ملي آرشیف ته سپارو، ددې نسخې قدامت به لومړی د کارپوهانو له خوا معلوم شي. بیا به یې د هرات موزیم په ویترین کې کېږدو.''

په تېرو درو لسیزو کې د افغانستان ډېر لرغون توکي، په ځانګړې توګه خطي نسخې له دې هېواده په ایستل شوي.

خو په دې وروستیو کې یې د بېرته ستنولو هڅې هم پیل شوې دي.

ورته مطالب