"د نشه يي توکو پر ضد سيمه ييزې همکارۍ ته اړتيا ده"

افغانستان ، پاکستان او ایران د ملګرو ملتونو د سازمان په ملاتړ په خپلو کې د نشه يي توکو خلاف مبارزه کې د ګډې همکارې د پراختیا لپاره په کابل کې د لوړې کچې غونډه جوړه کړې وه.

په افغانستان کې د نشه يي توکو د کر او تولید د مخنیوي پر لارو چارو غور او په ګډه د نیشه توکو د قاچاق وړونکو خلاف د سختو ګامونو اخیستل په کابل کې د وزیرانو په کچه د دغې جوړې شوې درې اړخیزې غونډې د بحثونو دوه مهم ټکي و.

خبریالانو ته د غونډې د پریکړو د اعلان پر مهال د غونډې برخه وال په اتفاق سره په دې باور و چې په افغانستان کې د نشه يي توکو په تولید کې د کمي راوستل د افغان حکومت او نړیوالې ټولنې د هڅو تر څنګه پراخې سیمه يیزې همکارۍ ته اړتیا لري.

د قاچاقاقو د مخنیوي لپاره د پولو کنټرول، د استخباراتي معلوماتو شریکول او د اړتیا په صورت کې د قاچاق وړونکو خلاف په شریکو پولو کې ګډ عملیات د ګډې همکارۍ مهم جزیات یاد شول.

په افغانستان کې د نشه يي توکو خلاف مبارزه کې د کابینې وزیر ضرار احمد مقبل د نیشه توکو د قاچاقود لارو تړل په هیواد کې د دغو توکو د کر او تولید د کچې له کمیدو سره تړلې خبره وبلله:

"نشه يي توکو ته اسان لاس رسی د دغو توکو د کر او تولید د هڅوونې یو مهم لامل دی. نو ځکه خو پکار ده چې موږ په ګډه د قاچاقو مخنیوي ته هم کلک پام واړو. په دې کې د همکارۍ کچه له دې معلومیدی شي چې کوم هیواد په کال کې څومره قاچاق او څومره قاچاق وړونکي نیسي؟"

د کابل د دغې درې اړخیزې غونډې تابیا د نشه يي توکو او جرمونو خلاف مبارزې کې د ملګرو ملتونو ادارې کړې وه.

د دغې ادارې مشر یوري فیدوتوف خبریالانو ته د څرګندونو پر مهال د غوندې له پریکړو د ملګرو ملتونو د سازمان د ملاتړ ژمنه وکړه:

"ملګري ملتونه د ګډو مسوولیتونو د اصولو په رڼا کې سیمه یزه همکاري هڅوي او ملاتړ یې کوي. زموږ په باور د استخباراتي معلوماتو شریکول، د قاچاق وړونکو د مالي سرچینو بندول او د ستونزې د مقابلې لپاره لازمه سیاسي لیوالتیا د دا وړ همکارۍ مهم عناصر دي."

په دغه خبري کنفرانس کې د پاکستان او ایران د نشه يي توکو خلاف مبارزې وزیرانو هر یو حاجي خدابخش رجر او مصطفی محمد نجار هم د خپلو حکومتونو په استازیتوب د نشه يي توکو خلاف مبارزه کې د ګدې همکارې د لا زیاتې پراختیا ژمنه وکړه.

د کابل دا وروستۍ غونډه د ملګرو ملتونو په نوښت په ۲۰۰۷ کال کې د نیشه توکو خلاف مبارزه کې د درې واړو ګاونډیوهیوادونو تر مینځه د همکارۍ له پیل راهیسې د وزیرانو د کچې پنځمه غونډه وه.

دا هم ویل شوي چې په راروان کال کې به په وار سره په اسلام اباد او تهران کې هم دوه ورته غونډې جوړې شي.

ورته مطالب