يوې افغانې مور شپږگوني ماشومان زيږولي

بهرني ماشومان
Image caption په نوره نړۍ کې څو گوني ماشومان ليدل شوي خو په افغانستان کې داسې کار لږ کيږي

د مزار شريف په روغتون کې ډاکټران وايي دغه ٢٤ کلنه ميرمن سارا چې په لومړي ځل ميندواره شوې وه په دې تمه د دوشنبه په ورځ( د جنوري ٢٣) ورغلې وه چې يو ماشوم لري.

دا ميرمن د بلخ له ولسوالۍ د مزار شريف ښار ته تللې وه.

کله چې ډاکټرانو معاينه کړه نو څرگنده شوه دې شپږ ماشومان لرل.

د بلخ ولايت د روغتيا د چارو ريس ښاغلي ميرويس بي بي سي ته وويل چې سارا درې نجونې او درې هلکان وزيږول.

د دغو ټولو ماشومانو وزن کم دى او يو پکې يوازې ٧٠٠ گرامه دى.

د ښاغلي ميرويس په وينا د ټولو ماشومانو روغتيا ښه ده.

د ډاکټرانو او روغتيا پالانو يوه ځانگړې ډله د دغو ماشومانو پالنه کوي.

ويل کيږي چې د سارا روغتيايي وضع ښه ده.

د ميرمن سارا دا کيسه په ځايي رسنيو کې ښه مطرح شوه.

د مزار شريف يوۀ اوسيدونکي بي بي سي ته وويل:

" سارا زړوره ښځه ده، بې جوړې ده خو نه پوهيږم چې څرنگه يې شپږ ماشومان وپالل، اوس بايد حکومت ورسره مرسته وکړي."

څو گونې زيږونې په افغانستان کې لږ پېښيږي.

د زيږون پر وخت د ماشومانو او ميندو مړينې لا هم په افغانستان کې خورا ډيرې دي.

ورته مطالب