په هرات کې درې ایټالوي عسکر ووژل شول

ایټالوي سرتېري
Image caption ایټالیا په افغانستان کې نژدې ۳۸۰۰ سرتېري لري.

د افغانستان په لوېديځ ولایت هرات کې درې ایټالوي سرتېري وژل شوي.

ایساف بي بي سي ته په یوه رالېږلې خبرپاڼه کې ویلي، دغه سرتېري د افغانستان په لوېديځ کې د عملیاتو پرمهال وژل شوي.

ایساف د وژل شوو سرتېرو هویت نه دی په ډاګه کړی.

خو په هرات کې ځايي چارواکو ویلي، دغه ایټالوي سرتېري داسې مهال وژل شوي، چې ګاډی یې د سفر پرمهال پړمخې واوښت.

د ایټالیا د دفاع وزارت ویلي، د وژل شوو سرتېرو جیپ ډوله ګاډي هڅه کوله، چې له یوه بل ګاډي سره سیالي وکړي.

پېښه د شینډنډ ولسوالۍ په سوېل لوېديځ کې نژدې ۱۲ میله لیرې په علي اباد کلي کې شوې ده.

ایټالیا د ناټو ځواکونو په چوکاټ کې په افغانستان کې شاوخوا ۳۸۰۰ سرتېري لري، چې ډېری یې په لوېديځ ولایت هرات کې مېشت دي.

ایټالیا په هرات کې د ولایتي بیارغاونې چارې هم پرمخ وړي.

په هرات کې د ایټالوي ځواکونو کنډک ویلي، یوه ګاډي یې د بل هغه چې د بدې هوا له کبله بند پاتې و، د ژغورلو هڅه کوله.

ورته مطالب