د ملي امنیت رییس له کاره ګوښه شو

د خپريدو وخت: 05:04 گرینویچ - چارشنبه 29 اگست 2012 - 08 وږی 1391
ښاغلی نبیل

ښاغلی نبيل د ملي امنیت د رییس په توګه له ټاکل کېدا مخکې د ولسمشر کرزي د خاصو ګاردانو مشر وو.

د افغانستان د ولسمشرۍ دفتر وايي چې د ملي امنیت رییس رحمت الله نبیل د ولسمشر کرزي له خوا له کاره ګوښه شوی دی، خو د ګوښه کېدو اصلي لامل یې نه دی په ډاګه کړی.

د ولسمشرۍ ماڼۍ په یوه خپره کړې ویناپاڼه کې ویلي چې ښاغلي کرزي د رحمت الله نبیل د کار ستاینه کړې ده.

ویناپاڼه دا هم وايي، چې تر دې وروسته به د ملي امنیت رییس د دوو کالو لپاره ټاکل کېږي.

په ویناپاڼه کې راغلي، چې ښاغلی نبیل شاید په یوه بهرني هېواد کې د سفیر په توګه وټاکل شي.

بل خوا، د ولسمشرۍ سرچینې دا هم ویلي چې د چارشنبې په ورځ (اګست ۲۹) به ولسمشر دفاع، کورنیو چارو وړاندیز شوي وزیران او د ملي امنیت نوی رییس معرفي کړي.

خو دا راپور په رسمي توګه کومې حکومتي سرچینې نه دی تایید کړی.

د ملي امنیت د مخکني رییس امرالله صالح له استعفا وروسته حامد کرزي ښاغلی نبيل د ملي امنیت د سرپرست او بیا وروسته د رییس په توګه ولسي جرګې ته معرفي کړ.

ښاغلی نبیل د ملي امنیت د رییس په توګه له ټاکل کېدا مخکې د ولسمشر د ځانګړو ګاردانو مشر وو.

د کورنیو او دفاع چارو وزیران د تېر اسد/زمري پر ۱۳مه د پاکستان له لوري پر افغان خاوره د بریدونو د مخنيوي په چاره کې د پاتې راتلو له کبله ولسي جرګې استیضاح او بیا وروسته یې د باور رایه ترې واخیسته.

په دې اړه نور مطالب

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .