یونسېف د کریکټ سیالیو له لارې د پولیو ضد کمپیاین پیلوي

د خپريدو وخت: 17:41 گرینویچ - پنجشنبه 13 سپتمبر 2012 - 23 وږی 1391

ښاغلي احمدزی د ګوزڼ پر ضد د کمپاین په برخې کې د کریکټ لوبغاړو غوراوی یو ډېر ښه او پر ځای ګام بولي

د ماشومانو نړیوال وجهي صندوق یا یونسیف سازمان وايي غواړي د کریکټ د نړیوالو سیالیو له لارې په ځینو هېوادونو کې د پولیو یا ګوزڼ ناروغۍ پر ضد خپل کمپاین جاری وساتي.

دغه سازمان د یو شمېر هېوادونو لوبغاړو ته بلنه هم ورکړې چې په سریلانکا کې د لوبو پر مهال یوه ګډه غونډه جوړه کړي او خپل پیغام هغو میندو او پلرونو ته ورسوي چې د خپلو ماشومانو له واکسینولو سره مخالفت کوي.

دا مهال د پولیو یا ماشومانو د ګوزڼ ناروغي یوازې په دریو هېوادونو افغانستان، پاکستان او نایجریا کې لیدل کیږي چې یو شمېر ماشومان ور څخه ځوریږي.

ټاکل شوې چې له افغانستان څخه د دغه سازمان له خوا د روغتیا او سولې سفیر او د افغانستان د کریکټ لوبډلې پخواني کیپټان رییس احمدزی هم په دغې غونډې کې ګډون وکړي.

"که د پولیو د مخنیوي لپاره اړین او موثر ګامونه پورته نه شی، نو د سیمي نورو هېوادونو ته هم د دې ناروغۍ د خپرېدو وېره موجوده ده."

ښاغلی احمدزی وایي "د دې لپاره چې راتلونکی نسل له ګوزڼ ناروغي وژغورو او کورنیو ته د پولیو ناروغیو د زیانونو په تړاو پیغام ورسوو، نو دوی به د خپلو ماشومانو ورغتیا ته بشپړ پام وکړي چې موږ یې ښه بېلګه همدا د کریکټ اوسنۍ لوبډله یادولی شو، چې که له روغتیا برخمن اوسو نو د پرمختګ زمینې به مو هم دغه شان ډېرې وي."

ښاغلي احمدزی د ګوزڼ پر ضد د کمپاین په برخې کې د کریکټ لوبغاړو غوراوی یو ډېر ښه او پر ځای ګام بولي، ځکه د ده په وینا دا مهال افغان کریکټ لوبغاړي د خلکو تر منځ له ښه باوره برخمن دي او په ټولنه کې به یې اغېز پراخ وي.

ښاغلي احمدزي زیاته کړه پولیو یا د ماشومانو ګوزڼ هغه ناروغي ده، چې له امله یې لا هم هر کال یو شمېر ماشومان مري او یا هم د ټول عمر لپاره معیوبېږي.

د روغتیا نړیوال سازمان وايي که د پولیو د مخنیوي لپاره اړین او موثر ګامونه پورته نه شی، نو د سیمي نورو هېوادونو ته هم د دې ناروغۍ د خپرېدو وېره موجوده ده.

په دې اړه نور مطالب

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .