کابل م. م ته د پاکستاني بریدونو شکایت وکړ

د خپريدو وخت: 11:07 گرینویچ - 23 سپتمبر 2012 - 02 تله 1391
زلمی رسول

دا شکایت په داسې وخت کې ملګرو ملتو ته رسول شوی، چې تېره ورځ د پاکستان له خوا راتوغېدونکي دوه سوه توغندي د افغانستان په ختیزو سیمو لګېدلي دي.

د افغانستان د بهرنیو چارو وزیر ډاکټر زلمي رسول د ملګرو ملتونو په امنیت شورا کې په دې اړه د افغان حکومت ژوره اندېښنه څرګنده کړې او ویېلي یې دي چې کېدای شي دا بریدونه د افغانستان او پاکستان پر اړیکو او د سیمې پر سولې او ټیکاو ناوړه اغېز وکړي.

افغان حکومت د پاکستان له خوا د افغانستان پر ختیزو سیمو د لګېدونکو توغندو په اړه څو ځله خپلې ګیلې او اندېښنې له پاکستاني حکومت سره شریکې کړې وې، خو دا لومړی ځل دی، چې دغه مساله د ملګرو ملتونو د امنیت تر شورا رسوي.

د افغانستان د بهرنیو چارو وزارت یو ویاند فرامرز تمنا نن په کابل کې خبریالانو ته د یوې خبري غونډې پر مهال وویل، چې د دغه هېواد د بهرنیو چارو وزیر دغه مسله په جدي ډول د ملګرو ملتونو د امنیت شورا په غونډه کې مطرح کړې ده.

"په هغې ځانګړې وینا کې چې د بهرنیو چارو ښاغلي وزیر د ملګرو ملتونو په امنیت شورا کې وکړه، د ډېرو نورو مسایلو پر مطرح کولو سربېره یې ددغو توغندويي بریدونو په اړه د افغانستان ژوره اندېښنه څرګنده کړه. دا ځکه چې د دغو بریدونو روان پاتې کېدل به ددواړو هېوادونو پر اړیکو منفي اغېز وکړي."

ښاغلي تمنا همداراز وویل، ټاکل شوې افغان، پاکستاني او برتانوي چارواکي د ملګرو ملتونو د عمومي غونډې په څنډه کې له یوه بل سره خبرې وکړي. د ده په خبره دغه غونډه به د روانې زېږدیزې میاشتې په شپږ ویشتمه نېټه په نیویارک کې د ملګرو ملتونو په ودانۍ کې جوړه شي.

"د افغانستان، پاکستان او برتانیا د حکومتونو د مشرانو غونډه به د سپتمبر په شپږویشتمه په نیویارک کې جوړه شي. "

افغان چارواکو تر دې وړاندې هم ویلي وو، چې له تېر کابو یوه کاله را پدېخوا د افغانستان پر ختیزو کونړ او نورستان ولایتونو سلګونه توغندي د پاکستان له خوا راتوغول شوي چې د سیمې اوسېدونکو ته یې ځاني او مالي زیانونه اړولي دي.

د راپورونو له مخې د پاکستان له لوري را ورېدونکي توغندي تر پرونه د افغانستان په ختیزو سیمو لګېدلي چې له امله یې سلګونه کورنۍ کډه کولو ته اړوتې دي.

په دې اړه نور مطالب

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .