''د پت'' په نامه ۶۰ افغان مېرمنې وژل شوې

د خپريدو وخت: 12:42 گرینویچ - دوشنبه 08 اکتوبر 2012 - 17 تله 1391

د بشري حقونو خپلواک کمیسیون اوس د همدغه ډول پيښو د څیړنو په موخه په ټول افغانستان کې ( ملي تحقیق) په نوم پروګرام هم پیل کړی دی، چې نژدې شپږ میاشت وخت به ونیسي.

د افغانستان د بشري حقونو د خپلواک کیمسیون کمیشنره، ثریا صبحرنګ وايي، په دغه هیواد کې د ښځو پر وړاند پر ډېرېدونکي تاوتریخوالي سخته اندېښنه لري.

اغلې صبحرنګ وايي، په تیرو اوو میاشتو کې د ناموس په نوم ۶۰ د قتل پېښې او ۳۳ د جنسي تېریو پېښې د بشري حقونو په کیمسیون کې ثبت شوې دي.

نوموړې وايي، ډیره شونې ده چې د دغه ډول پیښو شمیر له هغه کچې ډیر وې، چې د بشري حقونو کمیسیون ته رسېدلې دی.

''هغه مساله، چې موږ یې په اړه ډېره اندېښنه لرو، همدغه د ښځو پر وړاندې تاوتریخوالی دی، چې له بدمرغه په بېلابېلو ډولونو کېږي. دغه تاوتریخوالی د ښځو د بدن د غړو له پرې کېدو نیولې بیا هغوی د غوښو تر خوړولو، په ځنځیر تړلو او وهل ټکولو پورې رسیږي. او له دې ټولو مهم د ناموس په نوم وژنې او سارايي محکمې هم په دغو تاوتریخوالو کې شاملې دي.''

ملي تحقیق

د افغانستان د بشري حقونو کمیسیون دارنګه وايي، د لومړي ځل لپاره یې د دغه ډول تاوتریخوالو د لاملونو د موندلو په موخه د ملي تحقیق په نوم یو پروګرام هم پيل کړی دی.

د دغه پرواګرم یو غړی، عبدالاحد فرزان وايي، پروګرام به یې نژدې شپږ میاشتې وخت ونیسي، چې د ښځو پر وړاندې د تاوتریخوالي اصلي لامونه وموي:

''د بشري حقونون کیمسیون به ډله ییزې مرکې وکړي او د خپلې څیړنې په اړه به د مختلفو ډلو نظرې راغونډوې کړي. دویم طریقه دا ده، چې مخامخ به د پيښو ځای ته ورځو او له هغه ځایه به کتنه کوو، چې هلته ښځې او ماشومان ساتل کیږي.''

د بشري حقونو خپلواک کیمسیون وايي، د دغه پروګرام له پیل راهیسې نژدې یوه نیمه میاشت وخت تیر شوی او وايي په دویم پړوا کې به پر مستندو فلمونو او د تاوتریخوال د راکمولو لارې چارې ولټوي.

په دې اړه نور مطالب

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .