کابل د برتانوي سرتېرو د نيولو هرکلى کړى دى

د خپريدو وخت: 17:18 گرینویچ - جمعه 12 اکتوبر 2012 - 21 تله 1391

د برتانوي سرتېرو په اړه به د افغانانو غبرگون په دې پورې تړلى وي چې بالاخر څه ورسره کېږي.

په کابل کې حکومت وايي دوى ته د هغو ادعاو شويو وژنو په باب ډير جزييات نه دې ورکړل شوي چې اوس يې د برتانوي پوځ پوليس پلټنه کوي.

خو د افغانستان د دفاع وزارت د دغو سرتيرو د نيولو هرکلى کړى دى او وايي برتاناي او ناټو سرتيري بايد د جگړې د قانون درناوي وکړي.

که څه هم په لندن کې د دفاع وزارت وايي چې په دغه پېښه کې وسله وال مخالفين ښکېل و خو په کابل کې ډېر دا قضيه د ناټو ځواکونو له خوا د ملکي وگړو له وژنو سره تړي.

دغه راز دا پېښه په افغانستان کې د بهرنيو ځواکونو له خوا په تېره لسيزه کې له نورو ناوړه پېښو سره هم تړل کيږي چې په دغه هېواد کې يې د بهرنيو ځواکونو پر پوځي ماموريت سيورى غوړولى دى.

که څه هم طالبانو تر برتانوي، امريکايي او نورو سرتېرو ډېر ملکي وگړي وژلي دي خو له بهرنيو سرتېرو د لا ښو ارزښتونو هېله کيږي.

ځينې افغانان داسې انگېري چې د ناټو سرتيري هر هغه څه کوي چې غواړي يې او د همدې استدلال لپاره يو افغان شننونکى وايي دغه نيونې د همدې نظر د بدلولو لپاره کېږي.

يو امريکايي سرتيرى چې سږ کال د ١٦ ملکيانو په وژنه ونيول شو اوس محاکمې ته منتظره دى. هغه وژنې تر ټولو بدې وې.

شپږ امريکايي عسکر د قران شريف په سوځولو کې د لاس لرلو په تور له پوځي ديسپلين سره مخامخ شول، له هغې پېښې وروسته په افغانستان کې له تاوتريخوالي ډکې مظاهرې وشوې.

د برتانوي سرتېرو په اړه به د افغانانو غبرگون په دې پورې تړلى وي چې بالاخر څه ورسره کېږي او دې ته به سترگې نيول شوې وي چې برتانوي چارواکي يې په څومره جديت تعقيبوي.

په دې اړه نور مطالب

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .