ناټو وردګو کې د دوو طالب قومندانانو د 'وژلو' ادعا کړې

د خپريدو وخت: 12:37 گرینویچ - دوشنبه 22 اکتوبر 2012 - 01 لړم 1391
د میدان وردګو نقشه

د کابل – کندهار لویه لاره په تېرو څو کالو کې چې د میدان وردګو ولایت کې تېره شوې، ډېره ناامنه شوې ده.

د میدان وردګو ولایتي ویاند ویلي چې په دغه ولایت کې د بهرنیو او افغان ځواکونو په ګډو عملیاتو کې دوه طالب قومندانان وژل شوي.

ولایتي ویاند شاهدالله شاهد بي بي سي ته وویل، چې په وژل شوو کې یو د طالبانو له لوري د چک لپاره ولسوال و.

نوموړی وايي، چې وژل شوي په دغه ولایت کې فعال اورپکي وو.

ښاغلی شاهد د یوه وژل شوي طالب قومندان نوم غلام علي ښودلی دی.

بل وژل شوی نقیب الله جهادیار ښودل شوی، چې په چک ولسوالۍ کې د ګډو ځواکونو په عملیاتو کې وژل شوی.

نوموړی زیاتوي، چې په دغو عملیاتو کې د طالبانو درې ساتونکي هم وژل شوي.

د میدان وردګو د والي ویاند زیاتوي، غلام علي د خلکو په تښتونې، د سړک غاړې ماینونو په اېښودلو او د کابل – کندهار پر لویه لاره په وسله والو بریدونو کې لاس درلود.

د کابل – کندهار لویه لاره په تېرو څو کالو کې چې د میدان وردګو ولایت کې تېره شوې، ډېره ناامنه شوې ده.

له تېرو څو اوونیو راهیسې په چک ولسوالۍ کې عملیات روان وو، چې د ولایتي ویاند په وینا، تر عملیاتو وروسته اوس په دغه ولسوالۍ کې امنیت په نسبي ډول ښه شوی دی.

خو د سیمې خلک وايي، چې ان د عملیاتو او جګړو له لاسه خپل ورځني کارونه نه شي کولی او ان ځینې وخت د کروندو سمبالول هم نه شي کولی.

د تېر اسد/ زمري پر اتمه طالبانو د چک ولسوال محمد اسمعیل وفا وواژه.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .