''د نورستان پارون ته غځېدلې لار پرانیزﺉ''

د خپريدو وخت: 12:29 گرینویچ - جمعه 09 نومبر 2012 - 19 لړم 1391

د کونړ چارواکي وايي د کړنګ ژمي تر رارسېدو وړاندې به لاره خوندي کړي.

د نورستان ختيځو او مرکزې ولسواليو ته ورغلې لارې ډېر ځله د ناامنيو او سختو واورو له امله بنديږي، خو اوس د پارون اوسېدونکي د لارې د بندېدو له امله د توکو د خورا لوړې بيې شکايت کوي.

ځايي استوګن وايي که حکومت د لارې خونديتوب ته پام ونه کړي نو دغلته به ګڼ خلک له خوراکي توکو د سخت کمښت سره مخامخ شي.

دوی وايي پارون ته خوراکي توکي په قاچاق وړل کېږي چې دډېرو يې د رانيولو وس نه کېږي.

د نورستان چارواکي د لارې په نه خونديتوب کونړ هغه ملامتوي او وايي چې د پارون لار د کونړ په چپه دره کې تړل شوې.

د نورستان والي تميم نورستانى وايي ددغې لارې نا خوندي حالت د پارون او نورو سيمو وګړي کلک اغېزمن کړي.

"داسې رپوټونه هم شته چې له دغه ناخوندي حالته لارشکوونکو ته هم يو څه په ګوتو ورځي."

د کونړ چارواکي وايي نورستان ته د ورغځېدلې لارې د بشپړخونديتوب لپاره يې هڅې پيل کړي او ډېر ژر به د افغان پوځ سرتېرې د سيمې د امنيت لپاره ورشي.

دکونړ والي سيد فضل الله وحيدي وايي نه يوازې د نورستان اوسېدونکي د لارې د ناامنيو له امله ځورېږي، د کونړ د چپې درې وګړي يې هم ترې ځورېږي.

که څه هم د لارې د بنديدو پړه چارواکي پر خپلو وسله والو مخالفينو ور اچوي، خو وسله وال طالبان وايي دوی يوازې حکومتي توکي پلټي او د ولسي خلکو پر وړاندې یې هېڅ خنډ نه شته.

ځينې خلک دا هم وايي چې د کونړ او نورستان يو شمېر هغو درو ته چې د وسله والو طالبانو د شتون باور پرې کېږي، د حکومت له لوري کله کله لارې تړل کېږي.

داسې رپوټونه هم شته چې له دغه ناخوندي حالته لارشکوونکو ته هم يو څه په ګوتو ورځي.

په دې اړه نور مطالب

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .