ترکیه افغان ځوانانو ته د هوايي چلند روزنه ورکوي

د خپريدو وخت: 13:04 گرینویچ - پنجشنبه 13 ډسمبر 2012 - 23 لیندۍ 1391

د وزیرانو په کچه د افغانستان، ترکیې او پاکستان په درې اړخیزه ناسته کې پرېکړه وشوه چې د اوسپنې پټلۍ په برخه کې به له افغانستان سره د ترکیې او پاکستان له تجربو ګټه واخیستل شي.

ترکیه د هوايي چلند په برخه کې افغان ځوانانو ته روزنه ورکوي. د افغانستان د ترانسپورت وزیر ډاکتر داوود علي نجفي او د فوائد عامې وزیر نجیب الله اوژن په دې تړاو د ترکیې او پاکستان له اړوندو چارواکو سره خبرې کړې دي.

د افغانستان د ترانسپورت وزیر وايي ترکیې ژمنه کړې چې له ۱۰ تر ۱۵ افغانانو ته به د هوايي چلند په برخه کې ۱۸ میاشتنۍ زده کړې ورکړي. دغه راز په افغانستان کې د ښاري ترانسپورت سره د مرستې لپاره به یو شمېر ترک کارپوهان هم افغانستان ته راشي.

د ترانسپورت د وزیر په وینا، ترکیې ژمنه وکړه چې د دغه پروسې د پیل لپاره به له ۱۰ نه تر ۱۵ پورې افغان ځوانان د ۱۸ میاشتو لپاره د ترکیې په عالي تحصیلي مرکزونو کې وروزي.

دغه راز موافقه وشوه چې په راتلونکي کې به د افغانستان د ښاري ټرانسپورت په برخه کې د ترکیې یو شمېر متخصصین افغانستان ته راشي او په دې برخه کې به له افغانانو سره مرسته وکړي.

په دې دوه اړخیزو او درې اړخیزو کتنو کې له ترکیې څخه د ایران او افغانستان له لارې پاکستان ته د اوسپنې پټلۍ د غزولو، سوداګرۍ او د اوسپنې پټلۍ په برخه کې د افغان کدرونو د روزنې په اړه خبرې وشوې.

د وزیرانو په کچه د افغانستان، ترکیې او پاکستان په دری اړخیزه ناسته کې پرېکړه وشوه چې د اوسپنې پټلۍ په برخه کې به له افغانستان سره د ترکیې او پاکستان له تجربو ګټه واخیستل شي او په دې برخه کې به له افغانانو سره مرسته او همکاري وشي.

د افغانستان او ترکیې چارواکو موافقه وکړه چې د دواړو هېوادونو تر منځ د لاسلیک شوې موافقتنامې په چوکاټ کې به ترکیه د هوانوردۍ د مصوونیت او امنیت په برخه کې یو شمېر افغان ځوانانو ته په دغه هېواد کې روزنه ورکوي.

په دې اړه نور مطالب

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .