صلاح الدین رباني ګوندي ولسمشر غواړي

د خپريدو وخت: 17:59 گرینویچ - جمعه 21 ډسمبر 2012 - 01 مرغومی 1391

له یوې لسیزې وروسته په لومړي ځل دغه ورځ د جمعیت اسلامي ګوند لخوا ولمانځل شوه، چې د یو شمېر نورو ګوندونو استازو هم په کې برخه اخیستې وه.

د افغانستان د سولې د عالي شورا مشر صلاح الدین رباني د ګوندونو په کچه د راتلونکو ولسمشریزو ټاکنو د ترسره کېدو غوښتنه وکړه.

ښاغلي رباني په ټاکنو کې د ګوندونو د رول لوبول د تل پاتې دیموکراسۍ په راوستو کې مهم وبلل.

د افغانستان د سولې د عالي شورا مشر صلاح الدین رباني وايي، روانه ناڅرګند حالت نه د وتلو او یوه سیاسي سمبالښت ته د رسېدو لپاره اړتیا ده، چې ګوندونه د سیاست د اصلي څېرو په توګه رول ولوبوي.

نوموړي چې، په افغانستان کې په سوله ییزه توګه د قدرت د لېږد د ۱۱کلیزې په لمانځ غونډه کې خبرې کولې، و يې ویل، چې راتلونکې ولسمشریزې تاکنې دې د ګوندونو په کچه ترسره شي.

د افغانستان د سولې د عالي شورا مشر صلاح الدین رباني وايي: "زموږ په باور ټاکنې باید د ګوندونو په کچه ترسره شي، که ځینې په دې کې څه ستونزه ویني، نو بله لار دا ده، چې د راتلونکو ملي شورا په ټاکنو کې ګوندونو ته په څوکيو کې برخه ورکړل شي".

د ملي ايتلاف مشر ډاکټر عبدالله عبدالله، چې په دغه غوڼده کې برخه اخیستې وه، خبرداری ورکوي، چې په راتلونکو ولسمشریزو ټاکنو کې دوی ته درغلي د منلو وړ نه ده.

"نن د سیاسي قدرت د لېږد مشروع وسیله ټاکنې دي. که څوک دا فکر لري، چې د نامشروع قدرت ادامه په درغلیو ټاکنو یا په دې سره تظمینوي، چې پر ټاکنو سترګې پټې کړي، دا خیال دې له خپله سره وباسي".

شا وخوا ۱۱کاله مخکې د طالبانو د رژیم له ړنګېدو وروسته د سولې د عالي شورا پخوانی مشر برهان الدین رباني د قدرت واک د موقتې ادارې مشر ولسمشر کرزي ته وسپاره.

خو له یوې لسیزې وروسته په لومړي ځل دغه ورځ د جمعیت اسلامي ګوند لخوا ولمانځل شوه، چې د یو شمېر نورو ګوندونو استازو هم په کې برخه اخیستې وه.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .