د بدخشان هوايي ډګر به "ژر" پرانیستل شي

د خپريدو وخت: 19:33 گرینویچ - شنبه‬ 29 ډسمبر 2012 - 09 مرغومی 1391

د بدخشان د مرکز فيض اباد هوايي ډګر له درې کلن کار وروسته اوس بشپړېدو ته نژدې شوی دی.

تمه ده چې د افغانستان د شمالي ولايت بدخشان هوايي ډګر ډېر ژر د الوتکو پر مخ په رسمي ډول پرانیستل شي.

د افغانستان د ترانسپورت او هوايي چلند وزارت وايي د دغه هوايي ډګر په پرانیستل کېدو به د بدخشان د خلکو د تګ راتګ ستونزې تر ډېره بريده هوارې شي.

د فيض اباد د هوايي ډګر ځغاست ليکه وړاندې تر دې په اساسي ډول جوړه نه وه او يوازې وړو الوتکو کولای شول دغه ولايت ته پروازونه وکړي.

د بدخشان د مرکز فيض اباد هوايي ډګر له درې کلن کار وروسته اوس بشپړېدو ته نژدې شوی دی.

د ترانسپورت وزارت وايي که څه هم دغه هوايي ډګر لا په رسمي ډول نه دی پرانیستل شوی، خو ځينو خصوصي هوايي شرکتونو ورته خپل پروازونه پيل کړي دي.

د دغه وزارت وياند ننګيالی قلاتوال وايي په رسمي ډول د دغه هوايي ډګر پرانیستل کېدل به د بدخشان خلکو ته د تګ راتګ له اړخه ډېرې اسانتیاوې رامنځ ته کړي چې په ژمي کې يې لارې خورا ستونزمنې وي.

افغان چارواکي وايي دغه هوايي ډګر د اسيا د پراختيايي بانک په مالي ملاتړ په معياري ډول جوړ شوی او په ټولو اړينو وسایلو سنبال دی.

د فيض اباد د هوايي ډګر ځغاست ليکه وړاندې تر دې په اساسي ډول جوړه نه وه او يوازې وړو الوتکو پرې پروازونه کولای شول.

د افغانستان د ترانسپورت او هوايي چلند وزارت وايي پلان لري چې د هېواد په ډېری ولايتونو کې هوايي ډګرونه جوړ کړي.

خوست، باميان، دايکندي، فراه، نيمروز، کندز او غزني هغه ولايتونه دي چې چارواکي وايي په معياري ډول به يې د هوايي ډګرونو د جوړېدو کار پيل شي.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .