کرزی امنیتي تړون ته 'خوشبین' ښکاري

د خپريدو وخت: 04:59 گرینویچ - جمعه 11 جنوري 2013 - 22 مرغومی 1391

د ښاغلي پنېتا په وینا، د امریکا او افغانستان ترمنځ رغول شوي اړیکي به پرې نه شي.

افغان ولسمشر حامد کرزي د امریکا د دفاع وزارت له چارواکو سره په خبرو کې وویل، په دې درې ورځني سفر کې ډاډمن دی، چې له واشنګټن سره به د امنیتي تړون پر سر خبرو کې یوې موافقې ته ورسېږي.

ښاغلي کرزي د تېرې پنجشنبې په ورځ (جنوري لسمه) له دفاع وزیر لیون پنېتا سره په خبرو کې وویل، هېواد یې ډېر ژر د خپل امنیت د نیولو جوګه کېدونکی دی.

حامد کرزی چې د خبرو لپاره د امریکا متحدو ایالتونو واشنګټن ته د دوه اړخیزه امنیتي تړون پر سر خبرو لپاره تللی، د جمعې په ورځ له ولسمشر بارک اوباما سره لیده کاته لري.

دفاع وزیر له کرزي سره په خبرو کې ویلي، چې واشنګټن او کابل په افغانستان کې د ملي حاکمیت او امنیت د ټینګولو لپاره هلې ځلې کوي.

د ښاغلي پنېتا په وینا، د امریکا او افغانستان ترمنځ رغول شوي اړیکي به پرې نه شي.

پر همدې مهال، امریکا په تېره سې شنبې اعلان وکړ، چې له افغانستانه د ۲۰۱۴ کال تر پایه د خپلو ټولو پوځيانو ایستل به وارزوي.

ښاغلی اوباما هوډ کړی و، چې د راتلونکي کال تر پایه له افغانستانه د خپلو ۶۶ زرو پوځيانو ډېره برخه خپل هېواد ته ستنه کړي.

تر دې مخکې، ځینو امریکايي چارواکو ویلي وو، چې په افغانستان کې د درې تر نهو زرو امریکايي پوځيانو د پاتې کېدو غوښتونکي دي.

وړاندې حامد کرزي ویلي وو، که چېرې امریکا د افغانستان مشروع غوښتنې ومنلې، او ددغه هېواد ګټې یې په پام کې ونیولې، امنیتي تړون به ورسره لاسلیک کړي.

په دې اړه نور مطالب

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .