طالبان د مالي ولس سولې او ثبات ته بولي

د خپريدو وخت: 16:20 گرینویچ - سه شنبه 15 جنوري 2013 - 26 مرغومی 1391

طالبان وايي فرانسې په مالي کې په لاسوهنې نړیوالې سولې ته له ژمنتیا نه سرغړونه وکړه.

په افغانستان کې وسله والو طالبانو د افریقا په مالي کې له خلکو او په جګړه کې له ښکېلو غاړو غوښتنه کړې چې د پردیو له لاسوهنې پرته په خپلو کې د سولې او ثبات تګلاره غوره کړي.

ذبیح الله مجاهد چې ځان د طالبانو ویاند معرفي کوي رسنیو ته په استولي ایمیل کې ویلي چې فرانسې په مالي کې په لاسوهنې نړیوالې سولې ته له ژمنتیا نه سرغړونه وکړه.

خو فرانسه چې د نړیوالو له ملاتړه برخمنه ده وايي له مالي نه د اورپکۍ ریښې باسي او د دې لپاره نور ځواکونه هم دغه هېواد ته استوي.

په همدې حال کې د فرانسې پوځ د مالي په لوېدیځ کې د ډایبلې پر ښارګوټي هوايي بریدونه کړي دي.

دغه ښارګوټی پرون اسلام پالو ځواکونو ونیو.

د سیمې اوسېدونکي وايي بمبارۍ چې څو ساعته یې دوام درلود د اسلامپاله ځواکونو یو شمېر کسان وژلي دي.

په همدې حال کې نایجریا، سېنېګال او ځینو نورو هېوادونو هم مالي ته د فرانسوي ځواکونو د ملاتړ په خاطر د خپلو عسکرو د استولو ژمنه کړې ده.

د جنورۍ په ۱۵ د ملګرو ملتونو د امنیت شورا بیړنۍ غونډې په مالي کې د اسلامي بنسټ پالو پرضد د فرانسې د پوځي لاس وهنې پراخ او ټينګ ملاتړ وکړ.

تر غونډې وروسته په ملګروملتونو کې د فرانسې سفیر وویل هیلمن دی چې په مالي کې به د ژمنه شوو افریقایي ځواکونو ځای پرځای کېدل ګړندي شي.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .