د ارواښاد غلام محمد زرملوال جنازه وشوه

د خپريدو وخت: 10:55 گرینویچ - پنجشنبه 24 جنوري 2013 - 05 سلواغه 1391

د پښتو ژبې د څڼو سينگارولو محاوره ښايي ډېرو نه وي اورېدلې، خو زرملوال د خپلې لومړۍ او وروستۍ مينې څڼې تر وروستي توانه سينگار کړې.

د نومیالي افغان لیکوال، ژورنالست او ټولینز شخصیت ارواښاد غلام محمد زرملوال جنازه د کابل په عیدګاه جومات کې (پنجشنبه، د جنورۍ ۲۴) وشوه.

د ارواښاد زرملوال په جنازه کې د هېواد ډېر شمېر لیکوالو، ژورنالستانو علمي او فرهنګي شخصیتونو او د نوموړي دوستانو او خپلوانو ګډون کړی وو.

ارواښاد زرملوال د ورپېښې ناروغۍ له امله د جنورۍ په ۱۹ شپه په لندن کې وفات شو.

د اروښاد مېرمنې ویلي و، د نوموړي جنازه به افغانستان ته لېږدوي. دې د ښاغلي زرملوال په اړه وویل که څه هم ناروغ و خو "له سهاره تر ماښامه يې یوازې د افغانستان په اړه فکر کاوه".

ارواښاد زرملوال کلونه د بي بي سي له لارې د افغان ژورنالیزم په برخه کې کار وکړ چې د خپل ولس غږ به یې تر نورو رساوه.

د ارواښاد د جنازې له ګډونوالو څخه یوه، د افغانستان د علومو اکاډمۍ غړي څېړندوی محمد نبي صلاحي وویل:

"ارواښاد زرملوال د یوه ژورنالست په توګه او همدغه راز د مورخ په توګه خورا بریالی شخصیت و. زه فکر کوم د ځوانانو لپاره به د هغه له پاتې اثارو نه ګټه اخیستل ډېر ګټور وي. ارواښاد خپلې ټولې لیکنې د ماخذونو پر بنسټ کړي او همدغه سبب دی، چې نژدې ټول اثار یې له علمي پلوه کره او په تول پوره دي. د نوموړي اثار باید په بیا بیا چاپ شي، چې دغه زموږ علمي پانګه ده. ارواښاد د افغانستان مهم علمي شخصیت و، چې مړینه يې بې شکه یوه لویه ضایع ده."

غلام محمد زرملوال صاحب د بي بي سي پښتو څانګې له هغو لومړيو کارکوونکو و، چې د شلمې پېړۍ افغانستان د مطبوعاتو هره برخه ورته معلومه وه.

نوموړي د ژورنالیزم ترڅنګ د بېلا بېلو سیاسي، ټولنیزو او علمي موضوع ګانو په اړه کتابونه او لیکنې کړې وې.

ارواښاد زرملوال په دې وروستیو کې سره له دې چې سخت ناروغ و، ''د پېریانو جګړه'' او ''د بنګله دېش بې ستري'' په نامه دوه کتابونه يې پښتو ته وژباړل.

نوموړي تر هغه چې يې توان درلود، د جاري تحولاتو په اړه په ټولنیزو غونډو کې هم حضور درلود. په ولس کې د سیاسي ویښتابه ترڅنګ نوموړی د ژبې د ودې او سمسورتیا په برخه کې هم تل فعال و.

د ارواښاد زرملوال د جنازې یوه بل ګډونوال او د افغانستان د سیمه ییزو څېړنو د مرکز مشر ښاغلي عبدالغفور لیوال د نوموړي په اړه داسې وویل:

"ارواښاد زرملوال له دوه دریو اړخونو یو استثنايي شخصیت و. یو دا چې په تاریخ پوهېده او غوښتل یې چې تاریخي وقایع له ځانګړي لید لوري ثبت کړي. بله دا چې د بي بي سي له یوې لویې رسنیزې ادارې سره د کار کولو له امله او همدا راز په انګریزي ژبې د بشپړ حاکمیت له امله په هغه څه چې د افغانستان د معاصر تاریخ په اړه په انګلیسي ژبه لیکل کېدل، ښه پوهېده او دغه سبب دی، چې د ده لیکلي اثار زموږ د نسل لپاره د ډېر اهمیت وړ دي. د معاصر تاریخ د پېښو په اړه د ارواښاد زرملوال په اثارو کې بشپړ معلومات موندلای شو، چې د موثر تصمیم په لړ کې راسره مرسته کوي. دغه ملي شخصیت، لکه چې یې فکر کاوه هماغسې یې عمل هم کاوه، له همدې امله زه فکر کوم، اوس چې ارواښاد زرملوال زموږ په منځ کې نه شته، ځوان نسل باید د هغه له لیکنو او افکارو ګټه واخلي."

"د زرملوال ليکنې به تر نيوکو لاندې راتلې، د هغو له خوا چې رښتيا وينا يې نه خوښېده. د ده په لومړيو کتابونو به نه د چاپځي نوم و او نه د خپروونکو، ځکه چې دا ټول کارونه ده پخپله سر ته رسول."

صفیه حلیم

ارواښاد زرملوال له بي بي سي سره د خپل اوږد مهاله کار په بهیر کې تر لاسه کړې علمي تجربه د ژوند تر وروستیو شېبو په پرله پسې توګه خپلو هېوادوالو ته لېږدوله.

د بي بي سي پښتو څانګې پخوانۍ مشره صفیه حلیم د ارواښاد زرملوال په اړه وايي:

"د زرملوال ليکنې به تر نيوکو لاندې راتلې، د هغو له خوا چې رښتيا وينا يې نه خوښېده. د ده په لومړيو کتابونو به نه د چاپځي نوم و او نه د خپروونکو، ځکه چې دا ټول کارونه ده په خپله سر ته رسول. يو وخت يې ويل، له خدای نه مې ۱۵ کاله ژوند غوښتی، چې يو څو کتابونه په کې نور وليکم. ښايي تر اوسه يې له څلوېښتو زيات کتابونه په خپله ليکلي او يا يې ژباړلي وي. د پښتو ژبې د څڼو سينګارولو محاوره ښايي ډېرو نه وي اورېدلې، خو زرملوال د خپلې لومړۍ او وروستۍ مينې څڼې تر وروستي توانه سينګار کړې."

د ارواښاد غلام محمد زرملوال جسد له ځايي وخت سره سم د ماسپښین په شاخوا درې بجې د کابل ښار په شهدای صالحین هدیره کې خاورو ته وسپارل شو.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .