غزني ښار کې چاودنې دوه کسان ووژل

د خپريدو وخت: 08:46 گرینویچ - شنبه‬ 26 جنوري 2013 - 07 سلواغه 1391

یو ماشوم، یوه ښځه او یو سپین ږیری هم ټپیان شوي.

په غزني ښار کې چاودنې لږترلږه دوه کسان وژلي او تر لسو ډېر نور یې ټپیان کړي دي.

د غزني د ملکي روغتون ډاکټر باز محمد همت بي بي سي ته وویل، چې د چاودنې له ځایه دوی ته دوه مړي او ۱۳ ټپیان وروړل شوي دي.

چاودنه د شنبې په ورځ (جنوري ۲۶) غرمه دوولس نیمې بجې د غزني ښار په ''قلعه سبز'' سیمه کې، داسې مهال وشوه، چې د خلکو ګڼه ګوڼه په کې ډېره وه.

ښاغلی همت وايي، چې د څلورو ټپیانو روغتیايي وضعیت د اندېښنې وړ دی.

دی وايي چې په ټپیانو کې دوه ماشومان، یوه ښځه او دوه ترافیک دي.

د غزني امنیتي چارواکي وايي، په چاودنه کې یو پولیس او یو ولسي وګړی وژل شوي او پنځه کسان ټپیان دي.

کلاه سبز جاده د غزني ښار په شمال کې د ګڼې ګوڼې ډکه سیمه ده.

تر اوسه د دغې چاودنې مسؤولیت چا نه دی منلی.

دا په غزني ښار کې پر بایسکل د تړل شویو چاودېدونکو توکیو له کبله درېیمه چاودنه.

نژدې یوه نیمه میاشت وړاندې، د غزني امنیه قومندانۍ او باختر بانک ودانیو مخې ته پر بایسکل ځای پرځای شوي چاودېدونکي توکي وچاودل، چې ځینې ولسي خلک یې ټپیان کړل.

د ویلو ده، چې تېرکال په غزني ښار کې پر موټر سایکلونو بندیز ولګول شو.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .