پاکستان له افغانستانه مولوي فقیر محمد غواړي

د خپريدو وخت: 10:57 گرینویچ - پنجشنبه 21 فبروري 2013 - 03 کب 1391
مولوي فقیر محمد

مولوي فقیر محمد وړاندې ویلي وو، چې :''حکیم الله مسید به زموږ مشر وي''.

پاکستان له افغان حکومته غوښتي، چې د پاکستاني طالبانو نیول شوی قومندان ملاوي فقیر محمد پاکستان ته وسپاري.

ملاوي فقیر محمد په روانه اوونۍ کې د افغانستان په ختيځ ولایت ننګرهار کې ونیول شو.

که څه هم د افغانستان د ملي امنیت ادارې رسنیو ته د ملاوي فقیر محمد د نیولو په اړه په رسمي توګه څه نه دي ویلي، خو پاکستان لا له وړاندې پرې خپل غبرګون وښود.

مولوي فقیر محمد په قبایلي باجوړ سیمه کې د پاکستاني طالبانو یو جګپوړی مشر او قومندان و.

نوموړی باجوړ کې د پاکستاني پوځ له لوري د ۲۰۰۸ کال د عملیاتو په ترڅ کې افغانستان ته وتښتېد.

مطلوب

فقیر محمد باجوړ کې پر پاکستاني پوځ د مرګونو بریدونو پړ بلل شوی، او دا هم ویل کېږي، چې له افغان خاورې د پاکستان پر سرحدي پاکستاني پوستو بریدونه کوي.

د پاکستان د بهرنیو چارو وزارت ویاند محمد اعظم ویلي، پاکستان له افغان چارواکو د مولوي فقیر محمد او هغو نورو پاکستاني طالبانو د سپارلو غوښتنه کوي، چې په ترهګریزو بریدونو ښکېل او د پاکستان لپاره مطلوب کسان دي.

ویاند دا هم ویلي، چې د بهرنیو چارو وزیرې حنا رباني کهر له خپل افغان سیال زلمي رسول سره تېره شپه پر دې موضوع خبرې کړې دي.

د افغانستان د کورنیو چارو وزارت د مولوي فقیر محمد نیول کېدل تایید کړي، خو حنا رباني کهر تمه لري، چې نوموړی به ژر پاکستان ته وسپارل شي.

"مولوي فقیر محمد تېر کال له پاکستاني حکومت سره د سولې د لومړنیو خبرو له کبله له تحریکه وایستل شو."

د پاکستان حکومت د نوموړي د نیولو پر سر ۱۵۳۰۰۰ ډالر جایزه اېښې ده.

څارونکي د تحریک طالبان پاکستان (TTP) سیمه ییز قومندان نیول کېدل دغه تحریک ته یو لوی ګوزار بولي.مولوي فقیر محمد تېر کال د پاکستاني طالبانو له خوا له مرستیالې مشرۍ لرې شو.

نوموړی وروسته تر هغه له تحریکه وایستل شو، چې له پاکستاني حکومت سره یې د سولې په اړه خبرې کړې وې.

خو د پاکستاني طالبانو تحریک هغه مهال دا رد کړه، چې ګني مولوي فقیر محمد د ملا دادالله ځایناستی ټاکل شوی.

ملا دادالله تېر کال افغانستان کې د ناټو ځواکونو په بمبار کې ووژل شو.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .