کرزي له ایراني ولسمشر د لا پراخو اړیکو غوښتنه کړې

Image caption افغان حکومت وايي کابل او تهران په تېرو ۱۲ کلونو کې د سيمې په کچه د ستونزو د حل په ځانګړي ډول له نشه يي توکو سره د مبارزې په برخه کې همکاري کړې ده.

افغان ولسمشر حامد کرزي د ايران د ولسمشرۍ په ټاکنو کې د اصلاح غوښتونکي نوماند حسن روحاني د بري له امله د ايران خلکو ته مبارکي ويلې ده.

کابل او تهران په تېرو نژدې دوو لسيزو کې د تودو اړيکو پاللو ترڅنګ وخت ناوخت يو له بل سره ښکر په ښکر شوي او د طالبانو د واکمنۍ پر مهال خو خبره ان د جګړې تر پولې ورسېده.

خو د طالبانو د رژيم له ړنګېدو راوروسته د کابل او تهران اړيکې له دې سره سره ښې دي چې تهران په افغانستان کې د بهرنيو ځواکونو د پاتې کېدو په اړه ګيله من دی.

کابل کې زموږ همکار عبدالله ستانکزی وايي، د افغانستان د بهرنيو چارو وزارت وياند جانان موسی زي ویلي، افغان ولسمشر د ايران له نوي حکومت سره د ښو اړيکو پاللو ته لېواله دی:

''ولسمشر کرزي د حکومت او د افغانستان د خلکو په استازيتوب د ايران د ټاکنو ترسره کېدو په تړاو، ايران او د دغه هېواد خلکو ته تبريکي ويلې په ځانګړي ډول د ولسمشر په توګه د حسن روحاني د غوره کېدو له امله. او هيله يې څرګنده کړې ده چې د ښاغلي روحاني د نوي حکومت په موده کې د دواړو هېوادونو اړيکې او همکارۍ پراخې شي''.

افغان حکومت وايي کابل او تهران په تېرو ۱۲ کلونو کې د سيمې په کچه د ستونزو د حل په ځانګړي ډول له نشه يي توکو سره د مبارزې په برخه کې همکاري کړې ده.

ايران تر پاکستان وروسته د افغانستان دويم ګاونډی دی چې ډېری اړتيا وړ توکي ترې واردوي او د ۲۰۱۲ کال شمېرې ښيي چې د کابل او تهران ترمنځ د توکو د راکړې ورکړې کچه له يو نيم ميليارد ډالرو اووښتی ده.

د افغانستان د سوداګرۍ خونو مرستيال خان جان الکوزی وايي په ايران کې د نوي حکومت په راتلو به د دواړو هېوادونو ترمنځ سوداګريزې اړېکې هم وغوړېږي، چې پخوا له يو لړ ننګونو سره ملې وې

ایران او پاکستان

ايران او پاکستان دوه هغه هېوادونه دي چې تر ډېره بريده د افغانستان په سياست کې ښکېل دي او د افغانستان د ستراتيژيکو مطالعاتو د مرکز مشر داود مراديان په دې باور دی چې ښاغلی روحاني به د کابل، تهران او واشنګټن ترمنځ د همکاريو يو ګډ ميکانيزم رامنځته کړي:

Image caption حسن روحاني د ایران سیاسي او امنیتي برخو کې پرله پسې توګه مشر پاتې شوی.

''پرته له شکه پخپله حسن روحاني په تهران کې يو له هغو کسانو نه دی چې له امريکا سره د افغانستان د مسايلو په اړه د همکاريو د يوه ارتباطي کانال پرانستلو ته لېواله دی. او موږ په کابل کې هيله من يو هغه کارونه چې د پردې تر شا د ښاغلي روحاني همکارانو ترسره کول په دغه نوي پړاو کې هغه د پردې مخې ته راشي او موږ د هغو عملي مکانيزمونو شاهد واوسو چې د امريکا، افغانستان او ايران د درې اړخيزې همکارۍ له امله رامنځته کېږي''.

خو هغه ستونزه چې لا هم د کابل او تهران ترمنځ په بشپړ ډول نه ده حل شوې په ايران کې د افغان کډوالو او افغان زندانيانو ده ده.

د ايران سرحدي ځواکونو دغلته بيا بيا افغان کډوال د ايران له خاورې په زور ويستو ته اړ کړي او د ځينو راپورونو له مخې ځينې يې پر پوله وژلي دي.

ورته مطالب