طالبانو امریکايي بندي خوشي کولو ته غاړه کېښوده

Image caption د طالبانو یوه ویاند له قطر دفتره اسوشېټېډ پرېس خبري اژانس ته د تیلې فون پر کرښه ویلي، چې پیرګدال "روغ رمټ دی"

وسله والو طالبانو اعلان کړی، هغه امریکایی بندي چې له ۲۰۰۹ راپدېخوا له دوی سره بندي دی، په دې شرط خوشي کوي، چې له ګوانتانامو زندانه د طالبانو پنځه جګپوړي طالب بندیان یې مقابل کې خوشي شي.

دا خبره د طالبانو یوې سرچینې کړې ده.

دا اعلان ایله دوې ورځې وروسته د قطر دوحه کې د طالبانو د سیاسي دفتر تر پرانیستل کېدا وروسته شوی.

امریکایی پوځي بو برګډال هغه یوازېنی امریکایی بندي دی، چې د افغانستان په وروستۍ دوولس کلنه جګړه کې طالبانو د ډېر واخت لپاره ساتلی دی.

بو برګډال د ۲۰۰۹ جولای پر ۳۰مه، د افغانستان په سوېل ختیځ کې له خپلې اډې تر وتلو وروسته تري تم شوی، او باور کېږي، چې پاکستان ته وړل شوی دی.

د طالبانو یوه ویاند شاهین سهیل له قطر دفتره اسوشېټېډ پرېس خبري اژانس ته د تیلې فون پر کرښه ویلي، چې بو برګډال "روغ رمټ دی".

خو سهیل د دغه امریکايي بندي د ځای په اړه هېڅ نه دي ویلي.

وینا

د بو برګډال مور او پلار روانه میاشت کې د خپل ۲۷ کلن زوی له لوري د نړیوال سره صلیب کمېټې له لوري یوه وینا ترلاسه کړه.

د بندي والدینو د خپل زوی د وینا په اړه ډېر توضیحات نه دي ورکړي، خو ویلي یې دي چې د زوی د خوشي کېدو هیلې یې ډېرې شوې دي.

سهیل، چې د طالبانو د واکمنۍ پرمهال یې اسلام اباد کې د طالبانو د سفارت لومړي سکرتر پر دندې هم کار کړی، ویلي چې د بندیانو تبادله باید قطر کې له لومړنیو مخامخ خبرو مخکې وشي.

د بو برګډال په اړه یوې پوښتنې ته ښاغلي سهیل ویلي چې "لومړی باید بندیان خوشي شي"، چې په وینا یې "دا د تبادلې عملیه زموږ ترمنځ د خبرو د باور فضا پیاوړې کولی شي".

اټکل دی، چې تر راتلونکې شنبې پورې د امریکا د بهرنیو چارو وزیر جان کیري د سوریې د ملګرو کنفرانس کې د ګډون لپاره دوحې ته ولاړ شي.

داسې انګیرنې هم شته، چې کیري به دوحه کې د خپل سفر پرمهال د طالبانو له هغو استازو سره وګوري، چې دوې ورځې مخکې یې هلته د قطر په مرسته خپل سیاسي دفتر پرانیست.

ورته مطالب