ننګرهار کې ایساف پنځه ولسي وګړي وژلي

جلال اباد
Image caption پېښه د بهسودو ولسوالۍ سراچه سیمه کې د شپې ۱۱ بجې شوې ده.

د افغانستان په ختیځ ولایت ننګرهار کې چارواکي وايي د ایساف ځواکونو په هوايي برید کې پنځه ښکاریان وژلي.

د ننګرهار د امنیه قوماندانۍ ویاند حضرت حسین مشرقي وال بي بي سي ته وویل دا پېښه تېره شپه د جلال اباد ختیځ ته په سراچې سیمه کې رامنځته شوې ده.

سراچه له جلال اباد ښاره ایله څو کیلومتره لیرې ده.

ښاغلي مشرقيوال زیاته کړه وژل شوی کسان د مرغیو د ښکار لپاره وتلي وو، چې ایساف پرې د مخالفو وسله والو ګمان کړی او په نښه کړي يې دي:

"بېګا شپه شاوخوا یوولس بجې، د بهسودو ولسوالۍ سراچې سیمه کې پنځه ولسي کسان، چې د مرغیو د ښکار لپاره چره يي ټوپک ورسره وو، او عمرونه یې د ۱۲ او ۲۰ کلونو ترمنځ وو، بمبارۍ کې شهیدان شوي، مړي یې امنیه قومندانۍ روغتون ته لېږدولي دي".

پېښه د جلال اباد هوايي ډګر ته څېرمه رامنځ ته شوې، په دې هوايي ډګر کې د امریکايي ځواکونو لوی مرکز هم دی.

د ناټو ځاکونو یوه ویاند ویلي، چې له پېښې خبر شوي، چې د ولسي مرګ ژوبلې خبره یې لا تراوسه نه ده منلې.

نوموړی وايي، چې د وژل شویو مړي د جلال اباد مرکزي روغتون ته لېږدول شوي.

د ننګرهار د والي ویاند احمد ضیاء عبدلزي هم پېښه تایید کړې ده.

د ننګرهار د پوهنې ریاست ویاند محمد اصف شینواري ویلي چې "په وژل شویو ولسي وګړو کې درې ماشومان د ښوونځي زده کوونکي دي، دوه سره وروڼه دي".

ننګرهار د افغانستان ختيځ کې یو له ناامنه ولایتونو دی، چې ډېر کله ترې د ناامنیو خبرونه ورکول کېږي.

ورته مطالب