بغلان کې ماين د واده ۸ ګډونوال ټپيان کړي دي

Image caption د بغلان پوليس وايي تر اوسه نه مالومه شوې، چې دغه ماين چا ايښی

د افغانستان په شمال بغلان ولايت کې یوې بمي چاودنې د واده د مراسمو اته تنه ګډونوال ټپیان کړي دي.

ټپيان شوي اته واړه د واده ولسي وګړي بلل شوې دي.

د بغلان د پوليسو وياند جاوېد بشارت بي بي سي ته ويلي دغه چاودنه د شپې اته نيمې بجې د مرکزي بغلان په ولسوالۍ کې رامنځته شوې ده.

ښاغلی بشارت وايي ماين په هغه خیمه کې ځای پر ځای کړای شوی و، چې کوره لرې د مېلمنو لپاره درول شوې وه.

د بغلان د پولیسو وياند وویل، د پوليسو لومړنۍ موندنې ښيي، چې يو کوچنی پرسونل ضد ماين تازه په دغه ځای کې ښخ کړای شوی دی.

د بغلان پوليس وايي تر اوسه نه مالومه شوې، چې دغه ماين چا ايښی دی.

څو ورځې وړاندې د غزني ولایت په اندړو ولسوالۍ کې د واده د مراسمو پر یوه موټر بمي چاودنه وشوه، چې ۱۸ تنه ولسي وګړي په کې ووژل شول.

ځايي چارواکو وويل چې د اندړو د پېښې ډېری قربانيان ښځې او ماشومان دي.

تر دې وړاندې هم څو ځله د واده د ورا موټر د سړک د غاړې پر بمونو ختلي او زياته ملکي مرګ ژوبله يې رامنځته کړې ده.

د سړک د غاړې ماينونه چې د افغان حکومت وسله وال مخالفين يې، د افغان او بهرنيو ځواکونو لپاره ښخوي، ځينې وختونه پر ملکيانو الوځي.

د طالبانو مشر ملا محمد عمر هم څو کاله وړاندې د پرسونل ضد ماينونو ښخول (غير اسلامي او غير انساني بللي) و او هغه يې منع کړي و، خو لا هم د حکومت مخالفين ماينونه کاروي.

ملګرو ملتونو موده وړاندې د طالبانو له مشرانو وغوښتل چې په جګړه کې د ماينونو کارول ودروي.

د ملګرو ملتو په راپور کې د ملکي وګړو د مرګ ژوبلې تر ټولو لوی لامل د سړک د غاړې ماينونه ښوول شوي وو.

ورته مطالب