هلمنديان: پر کوکنارو يې زهرجن مواد شيندل شوي

Image caption بزګر وايي سږکال يې د کوکنارو حاصلات يو پر درې کم شوې دي

د سويلي ولایت هلمند يو شمير کروند‍ګرو ادعا کړې، چې ګواکې بهرنيو ځواکونو یې پر کروندو داسې خشخشاش شيندلي چې زهرجنې ځانګړتياوې لري.

د کروندګرو وينا ده چې له همدې کبله یې سږ کال د حاصلاتو کچه يو پر درېمه ښکته راغلې ده.

مصطفی سالک په خپل راپور کې وايي،چې دغه هلمنديان د دغو موادو له شيندلو سره د يو شمير ناروغيو د ډيریدو خبره هم کوي.

د هلمند د کرنې رياست د خشخاش ‌ډوله توکو شيندل مني، چې وايي د هغو بیلګې یې د تشخيص لپاره پلازمينې کابل ته استولي دي.

د هلمند د بیلو ولسواليو کروندګرو بي بي سي ته ويلي، چې بهرني ځواکونه په پرلپسې ډول د دوی پر کروندو زهرجن توکي شيندي چې يو نوی ډول یې د کوکنارو خشخاش تخم دی.

د ګرشک ولسوالۍ يوه کروندګر عبدالله بي بي سي ته وويل چې ګواکې د کال له پيله دغه زهرجن توکي شيندل کيدل.

دی وايي تير کال چې کومې ځمکې ۵ خرواره حاصل ورکړی و (يو خروار ۵۶۰ کیلوګرامه کېږي) سږ کال یې کچه ۳ خرواره ته راښکته شوې وه.

د سنګين ولسوالۍ يوه کروندګر محمد اسماعيل بيا وويل چې د زهرجنو توکو شيندلو سربيره پر کرنيز زيان د نس ناستي او پوستکي ناروغۍ هم ډيرې کړې دي.

د هملند د کرنې د برخې مشر روح الله روان بيا وويل چې سږکال د هلمند حاصلات د تیر په پرتله لږ شوي، نه بلکې ډير شوي دي.

ښاغلي روان د شيندل شویو توکو له کبله د ناروغيو د خپريدو خبره هم نا سمه وبلله، خو دا یې ومنله چې پر کروندو خشخاش شيندل شوي دي.

نوموړي وویل انګيري چې ښايي دا خشخاش د کوکنارو په تخمونو کې جينيټیکي بدلون راولي او له حاصله یې وغورځوي.

خو د هلمند د کرنې ريس وويل چې تر دې مهاله په کره توګه د شيندل شویو خشخاشو پر تشخيص نه دي توانيدلي، او بیلګي یې د پيژندګلوۍ لپاره د پلازمینې کابل لابراتوارونو ته استولي دي.

په تيرو کلونو کې بهرنيو ځواکونو د افغان هغو په څير د ځمکې له لارې د کوکنارو اړولو په کار کې برخه نه ده اخستې، خو کروندګرو له پخوا راهیسې ادعا کوله چې ګواکې بهرني ځواکونه د هوا له لارې په دې چاره کې ونډه اخلي.

ملګرو ملتو سږ کال یو ځل بیا په افغانستان کې د کوکنارو د کچې د پورته کيدو راپور ورکړ، چې تر ټولو ډير په هلمند ولایت کې کرل کيږي.

ورته مطالب