پروان کې د ناټو هوايي بريد ولسي مرگ ژوبله اړولې

  • 15 جنوري 2014 - 25 مرغومی 1392
Image copyright BBC World Service
Image caption پېښه د پروان ولايت په غوربند ولسوالۍ کې رامنځته شوې.

په افغانستان کې مېشت د ناټو ځواکونو، په پروان ولايت کې د ولسي وگړو د مرگ ژوبلې له امله خواشينې څرگنده کړې.

د ناټو په خپرې کړې وينا پاڼه کې راغلي چې په دغه سيمه کې اورپکي فعال وو او دغه گډ عمليات د هغوى د ځپلو لپاره پلان شوي وو.

پېښه د پروان ولايت په غوربند ولسوالۍ کې رامنځته شوې.

د ناټو سرچينې وايي په پېښه کې دوه ولسي وگړي وژل شوي دي.

خو د افغانستان له ولسمشرۍ ماڼۍ نه په خپرې شوې وينا پاڼه کې د پېښې د قربانيانو شمېر اته تنه (يوۀ مېرمنه او اووه ماشومان) ښوول شوي دي.

افغان ولسمشر حامد کرزي د ولسي وگړو وژنه په سختو ټکو کې غندلې.

په خبرپاڼه کې د افغان ولسمشر په وينا راغلي چې افغان حکومت له کلونو راهيسې د افغانستان پر کليو او بانډو د بمباريو د ودرېدا غوښتنه کړې.

خبرپاڼه زياتوي چې د ولسمشر اوباما په ليک کې له شويو ژمنو او هوکړو سره سره امريکايي ځواکونو يو ځل بيا پر وگړ مېشتو سيمو بمباري کړې.

ناټو سرچينې وايي "سيمه کې د خوځښت پر مهال يو غليم ځواک له څو ودانيو نه پر بهرنيو او افغان ځواکونو بريد وکړ. دوى هم ځوابي ډزې وکړي، او د غليم د ماتولو لپاره يې هوايي مرستې ته اړتيا لرله."

ناټو چارواکي وايي په عملياتو کې د دوى يو سرتير او لږ تر لړه لس اوزپکي هم د وژل شوي دي.

د ولسي وگړو مرگ ژوبله تل د کابل او واشنگټن ترمنځ د ناندرۍ يو ټکى پاتې شوى.

افغان ولسمشر پر وگړ مېشتو سيمو نه بمباري، او د خلکو د کورونو نه پلټل د امريکا او افغانستان ترمنځ د دوه اړخيز امنيتي تړون د لاسليک کولو د يوۀ شرط په توگه وړاندې کړى دى.

داسې برېښي چې له دې پېښې سره د افغان حکومت او امريکا ترمنځ وار له مخه ترينگلي اړيکې لا پسې کړکېچن شي.

ورته مطالب