پښتو شاعرۍ ته د سپین غر 'لار ډېوه' هم ور اضافه شو

د کتاب نوم: لار ډیوه

شاعر: محب سپین غر

خپرندوی: دانش خپرندویه ټولنه

د انځور حقوق
Image caption محب سپین غر: ''له ټولو ستونزو او ناخوالو سره سره له خپل برخليک نه د زړه له کومې منندوی يم چې زما د ژوند پېلامه يې له کلي راونښلوله''.

لار ډیوه د ښاغلی محب سپین غر شعري ټولګه ده، چې ډېری پکې ازاد شعرونه، څلوریزې او یو نیم غزل چاپ شوي. شاعر خپل کتاب د خپلې لومړنۍ مینې په نامه کړی.

ښاغلی سپین پخپله سریزه کې لیکلي: ''زموږ د کلي د باغچې د بارې پر څنډه يوه انار ګوسه ولاړه وه او زه به يې هره ورځ ښوونځي ته د تګ او راتګ پر وخت له څنګه تېرېدم. د دغې انارګوسې له سرو غوټيو د ډکو شنو انارګوټو انځور مې لا تراوسه د زړه پر دړه هماغسې را ځړېدلی پاتې دی .

اوس چې مې په خپل اټکل د ژوند نيمه لار وهلې، نو تر پخوا لا ډېر پر دې باور يم چې پر لومړي مين به هم د ښار په پرتله هرو مرو کلی او کليوال زيات ګران وي!''.

دغه راز بل ځای لیکي: ''له ټولو ستونزو او ناخوالو سره سره له خپل برخليک نه د زړه له کومې منندوی يم چې زما د ژوند پېلامه يې له کلي راونښلوله.

غر، کلی، وياله، ويلنی، چينه، ګودر، چنار، خوړ، ژرنده، پيتاوی او داسې نور هغه پېل ښکلاوې دي چې زما د راوروسته يومخيز ـ ښاريوالي ژوند انډول جوړوي.

کلی د ښار پړونی او پلو دی،کلی د ښار ښکلا او د هغه د ويارونو (عيبونو) پرده پوښ دی. کلی د پوهې او ګروهې زانګو او د هنري ازادۍ ټال دی.

زموږ د کلي پسرلی به هر کال د تنکيو او وړکيو غاټولو او نورو رنګارنګو بېدياني ګلانو د نندارې کوربه وو. ان زموږ زاړه چنار به هم دغې نندارې ته غلچکي غلچکي ورکتل او له ليدلو به يې خوند اخېست. موږ ووړکي او نجونې به هم ډله ډله له لمر څرک سره د شنو کروندو، بهاندو ويالو او شاوخوا رغځيو لار پسې واخېسته، د دغو زړه راکښونکو پسرلنيو نندارو پر ګليون به راسرشو. چابه پرخو پرېوللي رېدي او غاټول اوڼل، چابه د شمنګوټيو او زيړګلو غونچې جوړولې او چا به هم تازه راټوکېدلي ساراني سابه راټولول.

زموږ دنګ سپين غر به کال و سر خپله هسکه سپينه غاړه تورېدا ته نه پرېښووه. که لمنځو، نښترو، څېړيو، ځنغوزيو، ګور ګورو، مماڼو... به يې لمنې ورپسوللې او سرلوړۍ او سرکښۍ ته يې سرونه ور ټيټول، خو په ښکلا او سينګار کې به يې ورسره بياهم سيالي کوله».

له لار ډیوې څخه د درنو لوستونکیو لپاره دلته یو څو شعري بېلګې را اخلو:

زمانه

زمـانـې کـه د مـلا يې زما، نه يې

کـه دا تـه ټوله همـدا يې زما، نه يې

ته خو ګورې چې بېخوده ښکلا پال يم

نن چې ته ښکلا، ښکلا يې زما، نه يې

تـه!

د انځور حقوق
Image caption لار ډیوه په سپین کاغذ ښه کیفیت چاپ شوې او لوستونکي يې د هېواد له بېلابېلو کتابتونو تر لاسه کولای شي.

ته توده يې

لکه وينه،

لکه زړه

او لکه مينه.

ابـۍ!

زه هاغه خپلې،

هاغه ښکلې

د خاپوړو

هيلې،

له خپلې خړې

خاورې

لیرې

پر ايرو

تودوم.

لار ډیوه په سپین کاغذ ښه کیفیت چاپ شوې او لوستونکي يې د هېواد له بېلابېلو کتابتونو ترلاسه کولای شي.