"د کوکنارو د زیاتوالي لامل د همغږۍ نشتوالی دی"

د انځور حقوق Getty
Image caption د نشه يي توکو پر ضد د مبارزې وزارت چارواکي وايي د ملي دفاع وزارت ورسره د کوکنارو د اړولو په برخه کې د همکارۍ ژمنه وکړه.

له نشه يي توکو سره د مبارزې افغان چارواکي، تېر کال د کوکنارو کروندو د زیاتوالي لامل د اړوندو ادارو تر منځ نه همغږي او په ځینو سیمو کې د حکومتي کنټرول نشتوالی بولي.

دوی وايي اوس په لومړي ځل، د افغانستان ملي دفاع وزارت ژمنه کړې، چې د کوکنارو کروندو اړولو په برخه کې به ورسره مرسته کوي.

له کابله نور محمد سعید په خپل رپوټ کې له نشه يي توکو سره د مبارزې افغان چارواکو له خولې وايي پروسږ کال د افغانستان ملي دفاع وزارت له دوی سره د مسوولیتونو پر بنسټ د کوکنارو کروندو له منځه وړلو په مبارزه کې برخه نه درلوده، چې وايي له همدې کبله یې تلفات هم ډېر وو او د کوکنارو کروندو کچه هم پراخه شوې وه.

خو اوس کابل کې د کوکنارو کروندو اړولو لپاره د اړوندو ادارو ترمنځ د همغږۍ رامنځ ته کولو کنفرانس په وروستۍ ورځ د نشه يي توکو پر ضد د مبارزې وزارت د پالیسۍ او پلان مرستیال هارون رشید شيرزاد بي بي سي وویل، دا ځل ورسره د ملي دفاع وزارت په دې برخه کې د همکارۍ کلکه ژمنه کړې.

د ښاغلي شیرزاد په وینا په تېر کې د نشه يي توکو ضد مبارزې د ټکنیتوب یو لامل دغه مبارزې ته لومړتیوب نه ورکول و.

نوموړی وايي د وزارتونو په تګلارو او پروګرامونو کې د مخدره توکو پرضد د مبارزې اهداف شاملول به دغه مبارزه چټکه او ګټوره کړي.

د ارزګان ولایت چوري ولسوال نجیب الله حیات بیا وايي، د لرې پرتو او د حکومت له کنتروله بهر سیمو ځیني اوسېدونکي کوکنار کري، چې وايي دوی یې د مخنیوي لپاره حکومت ته وړاندیزونه لري.

له نشه یي توکو او جرمونو سره د مبارزې د ملګرو ملتونو ادارې این او ډي سي چارواکو د تېرکال په وروستیو کې ویلي وو چې افغانستان کې د کوکنارو د کروندو کچه ۲۰۰ زره هیکټاره ساحې ته رسېدلې، چې په وینا یې ریکارډ کچه ده.

ملګرو ملتونو د تېر کال په رپوټ کې ویلي و، په افغانستان کې د کوکنارو د تولید سم نیمايي برخه یوازې په یوه ولایت هلمند کې کرل شوي وو.

خو سربېره پر دې د تېر کال په اوږدو کې د افغانستان په یو شمېر نورو سیمو کې هم د کوکناور کروندې پراخې شوې او ان د فاریاب او بلخ ولایتونو په څېر ځیني سیمې، چې له کوکنارو پاکې اعلان شوې وې، یو ځل بیا په هغو سیمو کې شاملې شوې، چې کوکنار په کې کرل کېږي.

ورته مطالب