کندهار کې چاودنې یو پولیس وژلی

افغان پولیس- کندهار د انځور حقوق AP
Image caption چاودنه د کندهار ښار عربانو هدیرې سیمه کې شوې ده.

د کندهار ښار د لویې ویالې اړوند د عربو هدیرې په سیمه کې د ماین چاودنې یو افغان پولیس وژلی او پنځه نور یې ټپیان کړي دي.

چاودنه د پنجشنبې پر ورځ (مې ۲۹/غبرګولي ۸) شاوخوا اووه نیمې بجې د پولیسو پر یوه رنجر وشوه.

په سیمه کې یوې امنیتي سرچینې مامون دراني ته ویلي، چې په دې چاودنه کې یو پولیس (صاحب منصب) وژل شوی.

تر اوسه د چاودنې پړه چا پرغاړه نه ده اخیستې.

د تېر اپریل پر ۲۲ د کندهار ولايت غورک ولسوالۍ کې د افغان ملي پوليسو پر يوې پوستې د وسله والو په يوه بريد کې څلور پوليس وژل شوي وو او درې لادرکه وو.

ایساف

بل خوا، په افغانستان کې مېشتو ایساف ځواکونو په یوه خبرپاڼه کې د یوه بهرني سرتېري د وژل کېدو اعلان کړی.

ایساف وايي، دغه سرتېری په تېره چارشنبې (غبرګولی ۷) د افغانستان په سوېل کې د یوې هلیلکوپتر په پېښه کې وژل شوی.

د کندهار سیمه ییز چارواکي وايي، دغه چورلکه د تېرې چارشنبې په ورځ ناوخته په معروف ولسوالۍ کې د مخابراتي شبکې له یوې ستنې سره ټکر او ولوېده.

په معروف ولسوالۍ کې یوه امنیتي سرچینه وایي، د مخابراتي شبکې دغه ستنه (ټاور) د ولسوالۍ په مرکز کې دی.

که څه هم ایساف یوازې د یوه سرتېري د وژل کېدو پخلی کړی، خو له سیمې راپورونه ښيي چې پېښه کې یوشمېر سرتېري ژوبل شوي هم دي.

د انځور حقوق
Image caption ایساف د چورلکې د لوېدو دقیق ځای نه دی په ډاکه کړی.

په افغانستان کې د ایساف ځواکونو لپاره د الوتکو د لوېدو پېښې یو لوی ګواښ ګڼل شوی دی.

د تېر اپریل پر ۲۶ پنځه برتانوي پوځيان په سوېلي کندهار ولایت کې هغه مهال ووژل شول، چې الوتکه یې د ورځنۍ ګزمې پرمهال یې الوتکه راولوېده.

دا مهال په افغانستان کې د ناټو- ایساف تر ۵۲۰۰۰ ډېر پوځيان مېشت ديو چې ۳۳۰۰۰ پکې امریکایان دي.

د تېر جون له لومړۍ نېټې تر اوسه په افغانستان کې د وژل شویو برتانوي سرتېرو شمېر ۳۳ ته رسېدلی دی.

ورته مطالب