بدخشان کې طالبانو نیول شوي امنيتي سرتېري خوشي کړي

Image caption د بدخشان وردوج ولسوالۍ پیچلی جغرافیايي موقعیت لري

د افغانستان په شمال ختيځ بدخشان کې د عامه نظم د څلورو پوليسو په خوشي کېدو د هغو امنيتي سرتېرو شمېر ۱۶ ته ورسېد چې په وروستيو اوونيو کې د وسلوالو طالبانو له لوري ازاد شوي دي.

ځايي چارواکي وايي، د ملي اردو، ملي پوليسو، محلي پوليسو او نظم عامه په ګډون نژدې ۲۰ سرتېري څه باندې یوه مياشت وړاندې د وردوج ولسوالۍ په جګړه کې وسلوالو نيولي وو.

د بدخشان د والي وياند احمد نويد فروتن بي بي سي ته وويل، دغه کسان د ځايي مخورو په همکارۍ او د امنيتي ځواکونو د هڅو په پايله کې خوشي شوي دي.

احمد نويد فروتن وايي:"ممکن دا يې وروستۍ ډله وي، ځکه يو ځل اته کسه، بل ځل پنځه کسه او بل وارې څلور کسه خوشي شول. دغه کسان د ځايي مخورو او د سولې شورا په منځګړتوب او همکارۍ او د ملي اردو او ملي پوليسو د هڅو په پايله کې ازاد شول".

دوی وايي، پرېښودل شوي امنيتي سرتېري اوس له خپلو کورنيو سره يو ځای شوي دي.

Image caption بدخشان ولایت په ځینو والسوالیو کې وسله وال طالبان نفوذ لري

خو د طالبانو يوه ویاند په بدخشان کې د بي بي سي سيمه ييز خبريال ته ويلي، دغه کسان يې د زړه سوي له مخې خوشي کړي دي.

بدخشان ولایت کې وسله والو طالبانو یوه نیمه مياشت مخکې د پولیسو پر یو شمېر پوستو بریدونه کړي وو.

د افغانستان د کورنیو چارو وزارت ویلي و، وروسته له هغې چې د دولت مخالفینو د بدخشان ولایت په وردوج ولسوالۍ کې د پولیسو پر څو پوستو برید وکړ یو شمیر پولیس لادرکه شوي دي.

خو د پلازمېنې کابل امنيتي چارواکو له ۱۵ تنو نه د ډېرو پولیسو د لادرکه کېدو خبر ورکړی و او ویلي يې و، چې د دغو پولیسو د بیا موندولو په موخه یې عملیات پیل کړي دي.

طالبانو د دغې پېښې مسولیت پر غاړه اخیستی و او زیاته کړې يې وه چې د پولیسو په څلورو پوستو یې بریدونه کړي، چې څلور پولیس یې وژلي دي او یو شمېر نور یې له ځانه سره بیولي دي.

ورته مطالب