کونړ کې درنې چاودنې

د انځور حقوق b
Image caption کونړ پر ډېورېنډ کرښه پروت د افغانستان له نارامو ولايتونو ګڼل کېږي

کونړ تېره شپه داسې سترو چاودنو لړزولی چې غږ او درز يې لر بر خلک نه یوازې راویښ کړي چې بوږنولي يې هم دي.

په اسعد اباد کې د بي بي سي خبريال نعمت الله کرياب وايي "د ځمکې مخ تېره شپه څه باندې یولس بجې درانه ټکانونه وخوړل، او هر چا فکر کاوه چې چاودنې يې د کور منځ کې شوې دي."

په دې تېره نژدې موده کې د افغان ځواکونو او وسله والو اورپکو ترمنځ په دانګام کې هم د درنو نښتو راپورونه ورکړل شوي دي.

د بي بي سي خبريال وايي "لا هم د دغو هېښونکو چاودنو پر ځمکه نښې نښانې نشته. خو د چاودنو پر وخت د ډرون الوتکو غږونه هم اورېدل شوي دي."

د کونړ د پولیسو مشر عبدالحبیب سیدخېل وايي یوې الوتکي په مرورې، دانګام او ناړۍ ولسوالیو کې ۳ ستر او خرواریز بمونه غورځولي، خو ده ته يې د مرګژوبلې په اړه مالومات نشته.

هغسې چې ویل کېږي په دغو سیمو کې پر ځمکه د چاودنو پاتي شوني هم تر اوسه چا نه دي لیدلي.

زموږ خبريال نعمت الله کرياب وايي "دا د ۲۰۰۱ کال راهیسې په دې سیمه کې د خپل ډول د تر ټولو سترو چاودنو غږونه دي".

کونړ چې پر ډېورېنډ کرښه پروت دی، د افغانستان له نارامو ولايتونو ګڼل کېږي، او له ګاونډي نورستان سره په ګډه له څو کلونو راهيسې په کې خرپ او ترپ جګړې کېږي.

پر دې سربېره د ډېورېنډ افغانستان اړخ استوګنو تل پر پاکستان اړخ د توپونو ګوزارونو تور هم لګولی، خو پاکستان بيا دا تورنه رد کړي دي.