کابل کې د ایران سفارت ته څېرمه ځانمرګی برید شوی

د انځور حقوق Reuters
Image caption د برید په ځای کې د ترکي پوځيانو یو ویجاړ شوی موټر

د افغانستان پلازمېنه کابل کې د ایران سفارت مخې ته درنه چاودنه شوې.

کابل کې د بي بي سي خبریال وايي، برید په ځايي وخت ګهیځ شاوخوا اته بجې وشو، چې ورسره له انقرې څلورلاري نه زنبق څلورلارې ته پر وتلي سړک ډېر لوګی پورته شو.

د کابل پولیسو ویاند حشمت الله ستانکزي یوه سیمه ییز تلویزیون ته ویلي، دغه موټربم ځانمرګی برید و، چې د کرولا په مټ د ایران سفارت ته څېرمه شوی.

نوموړي پر خپل فیسبوک پاڼه لیکلي، په برید کې یو ترکی او یو ولس وګړی وژل شوي دي.

د کابل پولیس وايي د لومړنیو رپوټونو له مخې، په برید کې یو ولسي وګړی وژل شوی او یو بل ټپي دی.

د انځور حقوق Reuters

ویل کېږي، په هغه موټر کې، چې د برید کوونکی هدف و، د ترکیې سفارت کارکووونکي سپاره وو، خو کومې خپلواکې سرچینې دا خبر تر اوسه نه دی تایید کړی.

برید ‎ پر هغه سړک شوی، چې د ایران او ترکیې سفارتونه، د عزیزي بانک مرکزي دفتر او د 'کابل څلور ستوریز' هوټل یې په اوږدو کې پراته دي.

د ذبیح الله مجاهد په نامه د طالبانو یوه ویاند پر ټویټر پاڼه د برید پړه منلې ده، او ادعا کوي، چې ''وزیر اکبر خان سیمه کې د اشغالګرو قواوو یو قطار د کرولا موټر په وسیله په نښه کړی، چې درانه تلفات ورته اوښتي دي''.

د انځور حقوق Reuters
Image caption تر چاودنې وروسته امریکايي سرتېري هم د برید ځای ته ورسېدل

نوموړي دا هم ویلي، چې ''د کابل په ننڼي برید کې هدف د امریکايي ځواکونو قطار وو چې درانه تلفات ورته اوښتي، د بل کوم هیواد اتباع یا سفارتخانه هدف نه وو''.