څارنوالي: د فرخُندې د وژنې په اړه څېړنې به چټکې پیل کړو

د انځور حقوق Reuters
Image caption د افغانستان د کورنیو چارو وزارت د فرخندي په قتل د تورنو کسانو دوسیې لوی څارنوالۍ ته لېږلي دي.

د افغانستان لویه څارنوالي وایي، د فرخندې د وژلو او سوځولو په تور د شپږ څلوېښت کسانو دوسیې دوې ته سپارل شوي دي.

لویه څارنوالي وایي په ورسپارل شوو دوسیو کې ۱۹ تنه یې د کورنیو چارو وزارت کارکونکي او ۲۷ تنه نور عام وګړي دي .

لویه څارنوالي وایي د پېښې د څېړلو په تړاو یې پلاوی ټاکلی او خپلې څیړنې به په چټکۍ پیل کړي.

د دغې قضیې په تړاو د افغانستان لویې څارنوالۍ یو لنډ خبري کنفرانس درلود چې د دوسیې پر څرنګوالي یې خبریالانو ته معلومات ورکړل.

د لویې څارنوالۍ ویاند بصیر عزیزي وایي د دغې پیښې دوسیه نن دوی ته سپارل شوې او د څېړلو په موخه یې پلاوی ټاکل شوی دی.

ښاغلی عزیزي وایي اټکل کېږي چې د نیول شوو کسانو د دوسیو څېړل شاوخوا یوه میاشت وخت ونیسي.

فرخنده لس ورځې وړاندې په دې تور د قهرجنو خلکو له خوا ووژله شوه، چې ګواکې نوموړې قران سوځولی دی.

د دغې پېښې په اړه په ټولنیزو رسنیو کې پراخ غبرګونونه راوپارېدل .

په کور دننه او بهر کې مېشتو افغانونو په مدني اعتراضونو او لاریونونو لاس پورې کړ او له افغان حکومته یې وغوښتل چې د فرخندې وژونکو ته دې سزا ورکړل شي .

افغان حکومت ژمنه کړې چې د دې پیښې په تړاو به جدي پلټنې کوي .

ورته مطالب