بامیانو کې به ۸ لرغونې سیمې د تاریخي میراثونو په لړلیک کې پاتې وي

د انځور حقوق AFP
Image caption له ګواښ سره مخ ۸ لرغونې سیمې به د تاریخي میراثونو په لړلیک کې پاتې شي

په بامیان ولایت کې به ۸ لرغونې سیمې د تاریخي میراثونو په لړلیک کې پاتې وي.

دا خبره د ملګروملتونو د علمي او فرهنګي سازمان یونیسکواستازی کوي خو په بامیانو کې بیا چارواکي اندېښمن دي، چې د بامیانو ځینې سیمې به له دغه لیسته ویستلی شي.

دا اندېښنې هغه مهال راوټوکیدې، چې په یادوشویو سیمو کې اوس په خپل سرد کورونو د جوړیدو کارونه روان دي.

اسدالله جلالزی په راپور کې کاږي: که څه هم د یونیسکود کلتوري چارو مسوله سارا نوشادي وايي،د افغانستان د دولت په مرسته به په بامیانو کې اته لرغونې سیمې خوندي ساتل کېږي او د تاریخي میراثونو له لیسته به ونه غورځول شي.

خو د بامیانو ولایت چارواکي اندېښمن دي، دا سیمې ښايي له دې امله، چې په کې خلکو په خپل سر د کورونو د جوړولو تابیا کړې کیدای شي له تاریخي میراثونو له لیسته وغورځول شي.

د بامیانو د والي مرستیال محمد اصف ملبغ وايي، که چیر ته دا کار وشي نو ښې پایلې به ونه لري.

له بلې خوا د بامیانو د اطلاعاتو او فرهنګ ریس کبیر دادرس بیا وايي، د یادو سیمو د ساتلو لپاره ټینګ تدابیر نیول شوي.

د انځور حقوق BBC News Interactive

د بودا د مجسمو خالي رواقونه، او شاوخوا غارونه ، د غلغلې ښار، چهل ستون، څلویښت برجونه، د ضحاک ښار او دوه تاریخي کلاووې هغه اته سیمې دي، چې په ۲۰۰۳ زیږدیز کال کې له یونسکو سره په دې موخه ثبت شوي، چې له ګواښ سره مخ دي.

د بامیانو ولایت د زړه راښکونکو طبیعی منظرو له امله د سارک د فرهنګي پلازمینې په توګه ونومول شو.

ښایي له یوې میاشتې کمه موده کې د سارک د هیوادونو له خوا دلته د پلازمینې د معرفي کیدو لومړنی جشن هم جوړ شي.

ورته مطالب