سیاف: طالبان باید د ملاعمر له مرګ نه پند واخلي

پخواني جهادي مشر عبدرب رسول سیاف له طالبانو وغوښتل، چې د ملا عمر له مرګ نه عبرت واخلي او د افغانستان له دولت سره یوځای شي.

نوموړی ټینګار کوي، چې په افغانستان کې د جکړې د پای ته رسیدو لپاره دې د سولې خبرې له ټولو مخالفو ډلو سره وشي

ښاغلي سیاف په کابل کې یوې خبرې ناستې ته وینا، کې د طالبانو تحریک د پردیو لاسپوڅي وباله او دغه ډله یې د افغانستان د نابودۍ یوه وسېله وبلله.

ښاغلي سیاف د طالبانو د پخواني مشر ملا محمد عمر مړینې ته په اشارې وویل، چې دغه ډله دې د افغانستان په راتلونکي کې سیاسي بهیر کې شامله شي.

سیاف وویل:"د دې میز له شا پر هغوی غږ کوم چې دا ستاسې لپاره یو ښه فرصت دی، یو طلايي چانس دی. د دې پرځای چې همدغه لاره مو روانه وساتئ او بې ځایه ټینګار وکړئ، راشئ له خپل ملت سره مو کېنئ. د هېواد د راتلونکې په اړه مو یو ځای فکر وکړئ".

نوموړي په خبرو کې وویل:"امیر المومنین یعنی پر مومنانو حاکمیت، هغو کسانو چې امیرالمومنین جوړ کړ ولې یې د خپل هېواد چارې ورته ونه سپارلې، امیر المومنین خو یوازې د افغانستان لپاره نه دی".

پاکستان د ځینو افغان چاروکو او سیاسي شخصیتونو لخوا د طالبانو د تحریک د رامنځته کولو او له دې ډلې په ملاتړ تورن شوی.

ښاغلي سیاف خپلو خبرو کې زیاته کړه:"هغې لارې ته دوام مه ورکوئ چې بنسټ یې کوږ کېښودل شوی و. راځئ د خپل برخلیک په اړه یو ځای پرېکړه وکړو".

د انځور حقوق AFP
Image caption له طالبانو سره د افغان دولت د سولې خبرو لومړی پړاو جون میاشتې په اتمه اسلام اباد کې ترسره شوې او دویم پړاو یې چې اټکل کېده تېره اونۍ ترسره شي وځنډېدې

نوموړي وویل، چې داسې باید ونه شي، چې له یوې ډلې سره سوله وشي او نورې ډلې لکه د اسلامي دولت ډلې په کابل کې خپلې جګړې ته دوام ور کړي.

له طالبانو سره د افغان دولت د سولې خبرو لومړی پړاو جون میاشتې په اتمه اسلام اباد کې ترسره شوې او دویم پړاو یې چې اټکل کېده تېره اونۍ ترسره شي وځنډېدې.

د ملاعمر د مړینې د خبر له خپرېدو وروسته د نوموړي فاتحه د طالبانو ډلې پخواني غړي او یو شمېر دولتي چارواکو لخوا په کابل کې واخیستل شوه.

خو وروسته له دې افغان دولت دا مراسم منع کړل.

ورته مطالب