پاکستان د افغان کډوالو د پېژندپاڼو موده غځولې

د انځور حقوق bbc

پاکستان د افغان کډوالو د پېژندپاڼو موده تر شپږو مياشتو غځولې ده.

په اسلام اباد کې د ملګرو ملتونو وياندې دنيا اسلم خان ويلي، پاکستاني حکومت د افغان کډوالو د پېژندپاڼو موده تر شپږو مياشتو غځولې. په پاکستان کې د افغان کډوالو د کارټونو موده د ډسمبر په يو دېرشمه پای ته رسېدلې وه.

تېره مياشت د پاکستان د کورنيو چارو وزير چودري نثار مشرانو جرګې ته په خپله وينا کې ويلي وو، چې په پاکستان کې د افغان کډوالو د اوسېدو موده به نوره هم اوږده کړل شي.

نوموړي ويلي وو، پاکستان نشي کولی چې ټول افغان کډوال بېرته خپل هېواد ته ستانه کړي، نو ځکه له پاکستان سره د کارټونو يا پېژندپانو د مودې غځولو پرته بله کوم لار نشته.

د پاکستان پلازمېنه اسلام اباد کې، د ملګرو ملتونو وياندې دنيااسلم خان، بې بې سې ته ويلي چې، پاکستان په غير رسمي توګه د افغان کډوالو د کارټونو موده تر شپږو مياشتو غځولې.

ويانده زياتوي دا په دې لړ کې رسمي فيصله نه ده، د نوموړې په وينا رسمي پرېکړه به د کابينې په غونډه کې کېږې.

نوموړې وويل، د کارټونو د مودې غځولو پرېکړه ځکه شوې چې د پوليسو له خوا د کډوالو د ځورولو مخه ونيول شي.

په پاکستان کې د کډوالو د دفتر له خوا هم ټولو اړونده ادارو ته ليک لېږل شوی، چې د افغان کډوالو سره ناسم چلند ونشي.

د پاکستان لومړي وزير نواز شرېف هم د افغان کډوالو دپېژندپاڼو د مودې غځولو هوډ څرګند کړی. نوموړي له افغان چارواکو سره د ليدنې پر مهال د کډوالو د مودې غځولو خبره کړې وه.

د ملګرو ملتونو د يوه بل چارواکي قيصر اپريدي له خولې، پاکستان حکومت هغو کډوالو ته چې کارټونو نه لرې د پېژندپاڼو د ورکولو پلان لري.

ورته مطالب