غزني کې د پخواني او نوي ښاروال پرسر مخالفتونه لا هم روان دي

غزني
Image caption د غزني ښار یوشمېر نورو اوسېدونکو بیا د لاریونونو په کولو سره له سیمه ایزو چارواکو وغوښتل چې د ولسمشر فرمان دې عملي او نوي ښار وال ته دې د کار کولو زمینه برابره شي.

له شاوخوا اوو ورځو راهیسې په غزني کې په زرګونو تنه ښاریان یا په خیمو کې په پلتۍ وهلو سره او یاهم د لاریونونو په کولو سره خپلې غوښتنې وړاندې کوي.

د غزني ښاریان وايي، دوی ته دې بیرته زوړ ښار راولېږل شي او یا که هغه نه وي نو داسې څوک دې د غزني د ښاروال په توګه مقرر شي چې د غزني ښار اوسېدونکی وي.

د دوی شمېر چې زرګونو تنو ته رسېده په کلکه یې له مرکزي دولته غوښتنه کوله چې د غزني پخوانی ښاروال فریدون احمدي دې له دندې څخه نه ګوښه کوي.

هغوی وايي که ښاروال د غزني د ښار له خلکو ونه ټاکل شي نو دوی به خپل لاریون ته ادامه ورکوي او نوی ښار وال به هم دندې ته پرې نه ږدي.

د ولایتي شورا منشي حمیدالله سروري چې یو له دغو تحصن کوونکو څخه دی، وايي موږ دویم ځل ځکه خپلو تظاهراتو ته دوام ورکړ چې له دوی سره د غزني والي په داسې حال کې له اعتراض کوونکو سره ژمنه کړي وه چې د حکومت اجراییه ریاست هم په دې اړه ورسره خبرې کړې وي او د غزني والي ورته ویلې و چې په دریو ورځو کې به دغې ستونزې ته د پای ټکی کېښودل شي او نوی ښاروال نصیر احمد لیلیزی به هم نه معرفي کیږي خو دا ژمنه يې ماته کړه.

له بلې خوا، د غزني د یوشمېر نورو سیمو شاوخوا دوو زرو اوسېدونکو بیا د لاریونونو په کولو سره له سیمه ایزو چارواکو وغوښتل چې د ولسمشر فرمان دې عملي او نوي ښار وال ته دې د کار کولو زمینه برابره شي.

عبدالرؤف چې د نوي ښاروال په ملاتړ يې په لاریون کې برخه لرله او د کابل - کندهار لویه لاره یې هم د څو ساعتونو لپاره تړلي وه، وویل: ''موږ د قانون پلي کېدل غواړو او د ولسمشر د فرمان د منلو غوښتونکو یو. نن مو لاره بنده کړې بیا یې هم بندوو''.

که څه هم نوی ښاروال دوه ورځې وړاندې د ولایتي چارواکو له لوري معرفی شو خو اوس يې پر وړاندې اعتراضونه روان دي.

نژدې لس ورځې وړاندې نصير احمد لليزى د غزني د نوي ښاروال په توګه وګومارل شو. په عین حال کې د غزني د امنيې قوماندانۍ وياند فهيم اميري بیا وايي که څه هم لاريون کوونکو له څو ساعتونو راهيسې د کابل- کندهار لويه لار تړلې ده سره له دې چې لاريون سوله ييز دى خو لويه لاره بايد د خلکو پرمخ پرانيستل شي.

باید یادونه وشي چې ددغو تظاهراتو او لاریونونو له امله د غزني ښار زیاتره هټۍ تړلې او له اقتصادي پلوه خلکو په تېره بیا سوداګرو ته په میلیونونو افغانیو زیان رسېدلی دی.

ورته مطالب