د پاکستان حکومت د طالبانو پلاوي له ورتګه بېخبري ښوولې

د انځور حقوق AFP

د پاکستان د بهرنیو چارو وزارت سکرتر اعزاز احمد چوهدري وایي، دې هېواد ته د افغان طالبانو د پلاوی د راتګ په اړه معلومات نه لري.

ښاغلي چوهدری د چهارشنبې په ورځ یوې خبري ناسته کې د خبریالانو ددې پوښتنې په ځواب کې چې د طالبانو پلاوی له کوم دریځ څخه د افغان کډوالو او سرحدي سیمو د ستونزو په اړه خبرې کوي وویل: "زه پاکستان ته ددې پلاوي د راتګ په اړه هېڅ معلومات نه لرم، نو ځکه ستاسو دې پوښتنې ته ځواب هم راسره نشته."

قطر کې د طالبانو سیاسي دفتر پرون اعلان وکړ چې د هغوی یو پلاوی په پاکستان کې دی او د تګ هدف یې هم په پاکستان کې د افغان کډوالو، سرحدي مسایلو او په ځانګړې توګه د ملا برادر او یو شمېر نورو افغان زندانیانو خوشي کولو پرسر خبرې دي.

په اسلام اباد کې ځینو سرچینو بي بي سي ته ویلي، دا پلاوی د افغانستان دولت له استازو سره د خبرو لپاره چې ټاکل شوې وه، پرون ترسره شوی وای، پاکستان ته راغلی، خو دا خبرې اترې ځنډېدلي دي.

بلخوا د افغانستان د ولسمشر مرستیال ویاند دواخان مینه پال بي بي سي ته وویل، د افغانستان دولت لومړی له پاکستانه "عمل" غواړي او وروسته یې د خبرو پر ریښتینولۍ باور کولی شي.

ښاغلي مینه پال وویل: "ترڅو چې پاکستان د سولې خبرو څلوراړخیز ډلې په چوکاټ کې پر شویو ژمنو عمل ونه کړي او خپل خاوره کې د هغو [افغان] طالبانو پرضد اقدام ونکړي چې د سولې بلنې ته یې په جګړې ځواب ویلي، د پاکستان له لارې طالبانو سره مذاکره د وخت ضایع کول دي."

کابل کې د سه شنبې ورځې (حمل/ وري ۳۱مه) تر خونړي برید وروسته د پارلمان ځانګړې غونډه راوبلله او د طالبانو، سولې بهیر او د پاکستان په تړاو یې خپله نوې تګلاره روښانه کړه.

هغه له طالبانو د ترهګرې ډلې په توګه یادونه وکړه او له دې ډلې سره د دولت د جدي برخورد او د یو شمېر زنداني طالبانو د اعدامولو خبره یې وکړه.

د افغانستان ولسمشر همداراز وویل، د څلوراړخیزې ډلې د هوکړې له مخې پاکستان ژمنه کړې که طالبانو د سولې خبرې رد کړي، نو اسلام اباد به په خپله خاوره کې ددې ډلې پرضد عملیات کوي او اوس افغانستان انتظار باسي چې پاکستان پر خپلو ژمنو عمل وکړي.

ورته مطالب