افغان فلم د اوسکار په نوملړ کې و نه منل شو

Image caption د (تلل) په نوم فلم چې په فارسي ژبه دی د ایران او افغانستان ګډ محصول بلل کیږي

محمودي وروڼو یو ځل بیا په ایران کې د افغان کډوالو ژوند په خپل نوي فلم کې انځور کړی.

د رفتن (تلل) په نوم فلم چې په فارسي ژبه دی د ایران او افغانستان ګډ محصول بلل کېږي خو د افغانستان سیمنا د ټاکنې کمیسیون لخوا سږ کال د اسکار نړیوال فسټيوال ته د افغانستان لخوا څه موده مخکې وړاندې شو.

محمودي وروڼو دوه کاله وړاندې خپل لومړنی فلم (څو مترمکعبه مینه) د سینما مینوالو ته وړاندې کړ چې په ۱۰۸ نړیوال فسټيوالونو کې وځلېد.

هغه هم د افغانستان لخوا د اسکار نړیوال فسټيوال ته وړاندې شوی و.

لندن کې د فلمونو فسټيوال

د "سباوون خوبونه"؛ د لندن فلم فسټیوال ترټولو ښه مستند

کابل کې د هرات- مېرمن فلم نړیوال فسټیوال

په افغانستان کې ځینې سینماپوهان دا فلم د ایران محصول بولي او د اسکار فسټيوال ته یې وړاندې کول د افغان فلم جوړونکو پر وړاندې زیاتی بولي.

د تلل فلم جوړونکی نوید محمودي مني چې دا فلم د افغانستان او ایران سینما "ګډ محصول" دی.

Image caption د (تلل) فلم د نبي په نوم یو افغان کیسه راخلي چې ایران ته په ناقانونه لار د ننه کېږي.

نوموړي بي بي سي ته وویل "زه او ورور مې جمشيد دواړه په افغانستان کې زېږېدلي یوو خو په ایران کې اوسیږو. یوازې د افغانستان تابعیت لرو، خو ځینې فلم جوړونکي د اروپا یا امریکا تابعیت لري او فلمونه یې د افغانستان په نوم پېژندل کیږي. "

"د تلل فلم مهم لوبغاړي افغانان دي. خو تخنیکي چارې، کمره او اېډېټ یې د ایرانیانو په لاس شوي. ځکه نو د داوړو هېوادونو ګډ محصول بلل شوی."

محمودي وروڼه په ایران کې له ښوونځي وروسته لوړې زدکړې نه دي کړې خو د ایران ځوانې سینما له ډلې سره ملګري شوي او د ټلویزیوني فلمونو او سریالونو په جوړولو کې یې ډېر کاله برخه اخیستې.

هغوی د امنیتي ستونزو له امله نه غواړي په افغانستان کې کار وکړي.

نوید وایي ( د یوې ۷۰ - ۸۰ کسیزې ډلې خوندي ساتل چې هېڅکله افغانستان ته نه دي راغلي او د دې هېواد له حالاتو سره اشنا نه دي موږ ته ناممکنه ده چې هغوی ته د خوندیتابه ډاډ ورکړو.

تلل د محمودي وروڼو دوهم فلم دی. فلم نوید لیکلی او جوړ کړی او ورور یې جمشید د پروډیوسرۍ چارې په غاړه اخیستي.

د دوی داوړه فلمونه د سینما تر ټولو مهم فسټيوال اسکار ته وړاندې کېدل د دوی د کار د ښه کیفیت څرګندونه کوي.

د تلل فلم د نبي په نوم یو افغان کیسه راخلي چې ایران ته په ناقانونه لار د ننه کېږي.

Image caption په افغانستان کې ځینې سینماپوهان دا فلم د ایران محصول بولي او د اسکار فسټيوال ته یې وړاندې کول د افغان فلم جوړونکو پر وړاندې زیاتی بولي.

نبي له افغانستانه د ورور له دښمنو تښتي او غواړي چې له فرشتې سره چې له کورنۍ سره یو ځای په ایران کې اوسېږي اروپا ته ولاړ شي.

فرشته خپله کورنۍ نه خبروي یوازې د نبي خور د دوی په پلان خبره ده او څو ځلې د ټیليفون له لارې هغوی ته زارۍ کوي چې د اروپا له تګه د لارو د خطر له امله لاس په سر شي.

خو نبي او فرشته په خپل هوډ کې کلک دي او د تګ لپاره د پیسو چټکې موندنې ته ملا تړي.

د ایشوريا او رنبیر عشقي صحنې او د سانسور بورډ بیاتي

دواړه د پیسو په لټه کې دي چې د ورور دښمن یې نبي پېژني. کله چې نبي له خپل یوازیني ملګري د پیسو غوښتنه کوي هغه ورسره خیانت کوي او د ورور پر دښمنو یې سپاري.

د فلم ټوله کیسه په یوه ورځ کې ترسره کېږي. له پېښو او ستونزو ډکه ورځ چې هیلې په کې واقعیت ته نژدې کېږي او بیا مړاوې کېږي.

Image caption د فلم لومړۍ برخه پر یو موزون سرعت روانه ده خو دوهمه برخه یې ګړندۍ کېږي.

دا فلم په ښکلو سینمایي انځورونو سمبال دی. د کمرې موقعیت صحنې پیاوړې کړي چې ليدونکي هېښ کړي. خو ډېری وخت کمره پر، ترای پاډ نه ده کارول شوې او پر ځای یې له اوږې کار اخیستل شوی. دې کار انځور ثابت نه دی ساتلی او د لیدونکو سترګې ورسره ګواښوي.

رضااحمدي او فرشتې حسیني ورسپارل شوي رولونه ښه لوبولي که څه هم د سینما په ډګر کې پخوا نه دي لیدل شوي.

د فلم کیسه د چټک سفر واقعیتونه بیانوي. د فرشتې کورنۍ خبره نه ده چې هغې تېښتې ته ملا تړلې. دا کار لیدونکي وار له مخه هېښونې ته اړ باسي.

د فلم لومړۍ برخه پر یو موزون سرعت روانه ده خو دوهمه برخه یې ګړندۍ کېږي.

داسې انګېرل کیږي چې لومړۍ برخه د نیوریالیزم څرګندونه کوي او دوهمه برخه د اکشن فلمونو پر لار روانه ده.

خو د کډوالۍ ناخوالې او بې وسي په ریښتنه بڼه ښودل شوې. هغه کړکېچ چې میلیونونه وګړي نن سبا ورسره لاس او ګرېوان دي. د کډوالو په مزل کې لویې پرېکړې ناڅاپه کیږي. هره شېبه کېدای شي خطر د سړي مخې ته نېغ شي او د ژوند لورې بدل کړي.

Image caption د تلل فلم پر یوه وخت د کابل پر دریو سینماګانو کې نندارې ته کېښودل شو

د تلل فلم پر یوه وخت د کابل پر دریو سینماګانو کې نندارې ته کېښودل شو او ګڼ شمېر مینه وال یې ور مات کړل.

ټاکل شوې ده چې دا فلم د سویلي کوریا د بوسان فلمونو فسټيوال، د یونان تیسالونیکي فلمونو فسټيوال، د استونیا تلین فلمونو فسټيوال، د اسټرالیا برزبون او پسفیک فلمونو فسټيوالونو او د ایران فجر فلمونو فسټيوال کې هم ګډون وکړي.

پر دې فلم تر اوسه ۳۲۰ زره امریکایي ډالره لګېدلي. د فلم جوړونکی نوید محمودي وایي، په ګڼو نړیوالو فسټيوالونو کې ګډون به نه یوازې د فلم لګښت پوره کړي ګټه به هم وکړي

اړونده مطالب

ورته مطالب